Area di campamento banda di Costa Linda ta wordo limita e aña aki

ORANJESTAD – E area di campamento na altura di Costa Linda, e aña aki ta wordo limita. E noticia aki a bin di sorpresa diaranson mainta durante un conferencia di prensa di DOW, hunto cu polis. Vocero di polis Lito Laclé a haci e anuncio. Segun Lacle, e aña aki ta bira e ultimo cu polis lo ta encarga cu reparticion di espacio pa kampeer, ya cu otro aña Directie Infrastructuur en Planning (DIP) lo encarga su mes cu esaki. E lo bira estilo di kavel di carnaval, pues ta saca e parti full for di man di polis. E cantidad exacto di limitacion di lugar no ta conoci ainda segun Laclé. 

MENOS HENDE Y NO TRAILER 

Pues esaki ta nifica cu (aunke cu e number exacto no ta conoci) menos hende lo por bay campa na e sitio popular ey. No solamente esey, sino tambe cu no por yega eynan mas cu trailer pa motibo di e construccion cu ta tumando lugar pa loke ta Watty Vos Blvd. Segun Laclé, nan mes como polis a haya sa e informacion aki apenas dos siman. Pa loke ta e facilidadnan, a compronde cu no por usa trailer mas tampoco simplemente pasobra e lugar no ta acesible pa trailer yega na e parti ey. Pues ta unicamente tent lo por wordo permiti riba beach. 

TERENO

Segun Laclé, trabou di polis (ainda) ta pa duna tereno na un persona pa por campa, pa medio di e tereno disponibel. Pero pa esey mester sa cuanto tereno tin. “Nos ta depende completamente di nan” Laclé a bisa, refiriendo na personal di DIP. Lo tin otro lugarnan cu despues tambe lo keda afecta pa e trabounan di construccion, pero awor ta e parti menciona cerca di Costa Linda cu ta keda afecta net ora cu tin periodo di campamento. Despues lo tin otro lugarnan cu ta keda limita.