Coalicion a pasa mocion pa logra core cu Henk Kamp

ORANJESTAD – Pa medio di un mocion den Parlamento, partidonan den coalicion kier logra core cu e miembro di e colegio di supervision financiero CAFT, Henk Kamp (representante pa Hulanda:red). E mocion di partidonan den coalicion ta urgi gobierno pa reuni cu e colegio mas liher cu ta posibel riba e nombracion ilegal di Kamp, y pa urgi e colegio pa retira Kamp a base di articulo 3 di e ley di LAft. E mocion a keda presenta diaranson merdia pa parlamentario di MEP Endy Croes, durante e reunion cu a trata e situacion di e ley di LAFT. Mester bisa cu e ley mes no a keda trata pues no tabata un reunion pa vota pa e ley mes. Den un otro mocion, coalicion a urgi gobierno pa presenta e concepto di ley di LAFT mas pronto cu ta posibel den Parlamento. E ley, segun e protocol firma entre Hulanda y Aruba, mester a pasa prome cu 31 di december 2018, y despues aproba pa Conseho di Minister di Reino. 

MOCION APROBA 

E mocion a keda aproba cu 11 voto pro y 8 contra. No ta conoci kico lo sosode y si gobierno lo duna oido na e mocion aki. Un mocion ta keda un deseo y no ta un obligacion. E portal aki a compronde cu e intencion tabata pa adapta e ley nobo di LAft, pero den e prome version, lo kier atende solamente e normanan, y no e reglanan manera cu ta implica e caso di Henk Kamp. 

PROBLEMA CU KAMP

Manera cu NoticiaCla a raporta anteriormente caba, e asunto ta un problema particularmente pa fraccion di MEP, cu no kier mira Kamp como miembro. Esaki pasobra segun e ley, Kamp no por ta miembro basa riba su pasado como politico y ex minister. E ley no ta permiti un miembro pa esaki. Prome minister Evelyn Wever e tempo ey a reacciona pa e portal aki. “Bo ta mira cu Hulanda ta midi cu dos midi, y especialmente cu ta un otro gobierno”. Esaki ta un reaccion di Prome Minister Evelyn Wever Croes diahuebs mainta pa NoticiaCla riba e asunto di nombracion di Henk Kamp como miembro di e colegio di supervision financiero CAFT pa Hulanda. Wever a confirma tambe cu Gobierno di Aruba a opone. E pregunta ta surgi despues cu recientemente un parlamentario di e partido di Wever (MEP) esta Endy Croes a lansa e critica den direccion di e miembro di CAFT aki, Henk Kamp, cu e tin cu retira pasobra e ta nombra contra ley. E ley ta stipula cu un miembro di CAFT no por tabata riba lista di un partido de pasado of presente. Y Kamp tabata miembro di VVD di Hulanda y minister.  

OPONE

“Nos a opone. Nos a duna e comentario cu e ta contra di ley” Wever a bisa e portal aki. De hecho, gobierno a bisa cu e ley full e tempo ey den oposicion, Wever tabata contra. “Dia cu e ley a bin Parlamento, ora cu gobierno di AVP a bin cune, nan no tabatin e excepcion pa politiconan of ex politiconan den e ley” Wever a sigui bisa. Segun e prome mandatario, ta durante tratamento di presupuesto, parlamentarionan di AVP a lanta bisa cu nan kier evita cu hendenan manera Nilo Swaen, Nel Oduber, ex politiconan drenta den CAFT. 

AMIENDA 

“Anto nan a haci e cambio ey cu tabata dun amienda di parlamento durante reunion, sin consulta cu Hulanda. Pasobra e momento ey Sybilla Dekker (predecessor di Kamp) tabata miembro di Caft y sra Dekker tabata un minister den pasado” Wever a continua. Pues e tempo ey Wever cu tabata den oposicion (hunto cu varios e tempo ey awe ta den gobierno) a bisa cu e ta un cambio nobo y cu ‘zoiezo’ no ta comparti full e ley. Wever ta haya tur esaki weganan politico di e tempo ey di AVP. Hulanda sinembargo, segun Wever, a acepte, pero esey tabata nan responsabilidad. “Pero ora cu na mei Henk Kamp a wordo proponi door di Hulanda, mi a bisa Hulanda, bo ta violando ley. Cu esaki bo ta violando ley flagrantemente” Wever a sigui bisa. Acerca, Wever a bisa e portal aki cu e ley ta inconstitucional y e ley no ta corecto y tin pensa di cambia esaki. “Pero ey bo ta mira cu Hulanda ta midi cu dos midi, y especialmente cu ta un otro gobierno. Cu e gobierno aki, e midinan ta hopi mas skerpi. Bo ta sinti’e hopi mas skerpi riba e liniaal” Wever a finalisa bisando e tempo ey