Wever ta confirma cu Venezuela a cera frontera cu Aruba atrobe

ORANJESTAD – “ Manera anticipa, ta mustra cu Venezuela a cera frontera entre Aruba y Venezuela” esey tabata e prome reaccion di prome minister Evelyn Wever Croes riba e cierre di frontera anuncia oficialmente diaranson merdia pa vice presidente Delcy Rodriguez. “ Durante conferencia di prensa ayera, mi a expresa mi preocupacion pa e situacion dificil di Venezuela. Apesar cu e momento ey no tabata tin confirmacion di e ciere di frontera, mi a anticipa si cu esaki lo por pasa. E situacion ta keda uno hopi confuso y tenso” e mandatario a sigui bisa.

PA LOCUAL TA E CONSECUENCIANAN

Pa loke ta trata importacion di fruta, berdura y otro producto, nos a demostra aña pasa cu nos por a adapta e rutanan. Mi ta sigur cu esaki lo pasa awor atrobe. 

NOS HENDENAN NA VENEZUELA

Segun Wever, e ta mas preocupa pa nos hendenan cu ta na Venezuela pega aworaki. “ Apesar di e avisonan cu mi a duna varios biaha, tin varios persona cu a sigui biaha bay Venezuela”. E ta haci un apelacion na nos ciudadanonan cu na e momentonan aki ta na Venezuela y no por bin bek Aruba, pa registra na Embahada di Reino Hulandes na Caracas, y si mester, pa busca otro forma pa yega Aruba pasobra no tin indicacion ki dia e situacion lo normalisa. 

GASOLINE

Pa loke ta trata suministro di gasolin, jetfuel y fuel cu WEB mester pa genera energia, esakinan no ta core peliger. “Nos a segura esaki den pasado caba”. E ciere di frontera tin mas consecuencia y Gobierno di Aruba ta trahando pa mitiga e efectonan.” Awe tardi 3.30 mi lo duna un conferencia di prensa pa duna mas informacion. Cu e noticia aki mi ta pidi tur hende pa keda trankil, no bay den panico. Lo mi sigui duna informacion asina cu nos tin confirmacion” Wever a finalisa bisando.