Ruiz: Lo ‘trata ‘mediabeleid’ y informatievoorziening’ cu CAFT awe mainta

ORANJESTAD – E dos temanan cu minister di Finanza Xiomara Ruiz Maduro ta toca cu e colegio di supervision financiero CAFT den su reunion awe mainta, ta entre otro ‘e maneho di media’, y ‘e intercambio di informacion’. Segun Ruiz, loke tin aworaki no ta trahando. E mandatario ta referi na e cartanan cu ta wordo manda pa gobierno, pero cu ta worod publica prome cu gobierno mes haye. “Esey ta trece friccionan innecesario” Ruiz a bisa. Pesey e ta un momento propicio pa haci cambio riba e ‘media beleid’ di CAFT.

INTERCAMBIO DI INFORMACIONE intercambio di informacion tambe ta wordo atendi awe mainta, pasobra tin un bay bin di informacion pero cu CAFT constantemente ta bisa cu no ta suficiente. “E ora ta e momento pa trata (cu CAFT:red) kico ta locual cu CAFT kier na informacion, con nos tin cu deliver esaki. Con nan tambe tin cu haci e peticion” Ruiz a sigui bisa. Den e relato cu NoticiaCla a presenta e siman aki, por a nota cu CAFT constantemente ta tilda gobierno di no ta comunica segun e regla y ley di LAFT y cu e mester tene su mes na dje. Gobierno a mustra e ora cu e no sa mas con esaki mester ta y ta kico CAFT kier precies. Como tal esey lo keda discuti awe mainta tambe. “Lo bay fine tune miho pa asina e ora di parti di gobierno y CAFT, cada un partido sa con nan tin cu pidi informacion, y kico ta e informacion cu mester wordo delivered. Pa asina nos evita cu tin iritacion di cosnan inecesario” Ruiz a sigui bisa. 

E LECTURA

Pa loke ta e presentacion di presidente di CAFT diahuebs anochi, e mandatario a mustra su satisfaccion. E splicacion a duna un bista riba e loke a pasa durante transcurso di e añanan, y kico ta pasando e momentonan aki. No a tende ningun sorpresa, pasobra segun Ruiz, CAFT a pone den contexto loke ta pasando. E hecho cu hopi den publico a cuestiona e colegio di supervision pakico nan a ‘para na banda y wak e situacion financiero sin haci nada’, no ta nada nobo pa e mandatario. Segun Ruiz, nan (gobierno:red) a haci e preguntanan ey caba den pasado. “Y tin pregunta cu nunca lo bo haya e contesta cu lo bo kier scucha” Ruiz a bisa. Pesey, segun Ruiz, ta focus awor riba e trabounan cu tin cu wordo haci pa Aruba.