CITGO na gobierno: Lo retira varios trahado debi na sancionnan

ORANJESTAD – CITGO lo retira varios trahado riba termino corto, a consecuencia di e sancionan imponi recientemente pa Merca. E mensahe aki a keda ripiti diahuebs na representantenan di gobierno durante e encuentro planea y anuncia pa Prome Minister Evelyn Wever. Pa NoticiaCla, Wever no por a bisa di cuanto trahador ta papiando. E mes no a reuni cu nan, sino e team negoshador di gobierno. E noticia no ta nobo pasobra siman pasa Refineria di Aruba (RdA) su director Alvin Koolman a haci e anuncio ey caba. 

SOLUCION

Segun Wever den un mensahe publico diabierna, a sigura cu ‘nos gobierno mesora a pone contacto cu ehecutivonan nobo di e refineria pa evita esaki mas tanto posibel’. A mustra cu lamentablemente gobierno no tin tur cos den su man debi na e situacion tenso y confuso na Venezuela. “ Sinembargo nos lo sigi hasi tur esfuerso posibel pa evita cu trahadornan local perde trabou, y si nan perde trabou mes, atraves di instancianan laboral di gobierno, lo percura pa nan haya un otro trabou cu prioridad” Wever a sigui bisa. “ No ta facil, pero nos ta keda positivo cu nos lo logra”.

WARDANDO E TEAM NOBO

Wever mes ta wardando e board nobo tuma over pa e reuni cu nan. “ Esunnan cu Guaido a apunta diaranson” Wever a bisa NoticiaCla diabierna mainta, refiriendo na e noticia cu e portal aki a comparti cu Guaidó a cambia e directiva, aunke no ta conoci si nan (e directiva nobo: red) por sinta ya cu e directiva bieu por ‘reta’ nan legalmente.