Gradus di CAFT: Boso mes mester sali for di e situacion financiero aki!

Gradus di CAFT: Boso mes mester sali for di e situacion financiero aki!

Posted on 02/15/2019 10:19 am AST | Updated on 02/15/2019 10:49 am AST

ORANJESTAD – “Boso mes mester sali for di e situacion (financiero) aki y mas liher cu ta posibel”. Ta palabranan di presidente di e colegio di supervision financiero pa Aruba, Raymond Gradus a bisa un sala completamente yen na Aruba Caribbean Hilton hotel diahuebs atardi laat. No ta CAFT, no ta Hulanda, sino Aruba mes mester percura pa drecha e situacion financiero mas liher cu ta posibel pa evita mas problema. Pa 45 minuut largo, den presencia di Gobernador di Aruba Alfonso Boekhoudt y minister di Finanza Xiomara Ruiz Maduro, Gradus a pinta e situacion financiero di pais Aruba y mustra kico por haci pa remedia esaki. 

PARA WAK Y NO HACI NADA

Gradus repetidamente a sigura e sala cu e no ta reconoce e critica (ripiti pa varios miembro den sala:Red) cu nan (CAFT:red) a para wak y no a actua cu awe e situacion financiero di Aruba ta manera cu e ta. “Mi no ta reconoce e ponencia aki” Gradus a bisa. Dado momento un miembro di sala a ripiti e pregunta na Gradus den un manera mas directo posibel “Bo ta dispuesto pa acepta cu CAFT a para na banda, wak y no haci nada cu awe nos ta na e situacion aki?”, y  atroba Gradus a desvia di e pregunta y a keda riba su liña di presentacion, esta ‘Boso mes mester haci esaki. Mi no ta reconoce e ponencia ey (di cu CAFT mester admiti cu nan co-culpabel:red) ‘. 

ANALISIS

Bek pa e analisis di Gradus, el a haci algun comparacion cu e otro islanan den Reino Hulandes, manera e porcentahe di PIB, unda cu Aruba a sali esun di mas halto cu 24%, y cu su 8.9% di desempleo, e ta mas abou si cu Corsou, cu tine na 14%. Pa loke ta e debe annual, Gradus a mustra su preocupacion di e haltura di esaki.  Aruba tin cu paga  225 miyon florin pa aña na interes so. “Esey mi ta haya hopi preocupante” Gradus a bisa. 

IMPULSOLoke cu e presidente a recomenda, ta pa diversifica nos economia, y usa e posiblidad di energia alternativa duradero manera panel solar. ‘Traha riba esaki. E ta algo cu ta bon pa Aruba mirando e solo cu nos tin casi tur dia” Gradus a bisa. E ta un bon proyecto pa stimula economia y asina haci cosnan positivo pa Aruba. 

IMPUESTO ANTICUA

Pa loke ta e impuestonan, Gradus no tabatin bon palabra. “Boso sistema di impuesto ta atrasa. Ademas boso tin un grado halto di no cumplimento” Gradus a sigui bisa. Tur ta cosnan cu mester cambia y e ta spera cu esaki tuma lugar pronto. 

PAKICO CAFT TEY

Cu un mensahe final, Gradus a splica cu e motibo cu nan tey, ta pa yuda sigura cu Aruba su situacion por mehora drasticamente. Y cu no ta corecto cu nos futuro generacion ta haya e cuenta presenta, cu no ta nan culpa. Percura pa boso tin un sector colectivo pagabel. Mi ta desea boso hopi forza cu esaki. Mi sa cu boso por” Gradus a finalisa su discurso. 

PREGUNTANAN

A sigui un serie di pregunta, cu tabata basta skerpi den direccion di Gradus. Pero notable tabata e forma con Gradus tabata keda riba su liña di discurso, esta ‘No ta na CAFT sino na Aruba mes pa drecha e situacion financiero’. Practicamente cada pregunta, tabata haya e contesta final cu e tema ey. Tambe el a referi constantemente na e protocol firma, y cu gobierno tin cu simplemente tene su mes na palabracion di e protocol, y asina e no ta premira problema mas pa futuro. “Ta awor of nunca. No ta cuestion si ta bay logra e meta, sino cu ta simplemente un mester, cu esaki tin cu sosode” Gradus a bisa. Publico a puntra kico ta e scenario pio posibel pensabel, si no tin cumplimento, y atrobe Gradus a bay bek riba e protocol. E publico tabata hopi interesa den e aspect di personal, y varios a te hasta ofrece  solucionan. Pero ora cu un persona den publico a confronta Gradus cu e ultimo pregunta, ‘Con cerca nos ta di haya un ‘instruccion’ (aanwijzing), Gradus a bolbe contesta, ‘Esey ta un medida extremo cu  nos no kier usa, pero ta keda na Aruba pa nan mes resolve esaki. Boso mes mester haci esaki” Gradus a finalisa bisando. Den curso di diabierna, e presentacion lo aparece riba e website di e colegio esta www.cft.cw

  • Powered by SETAR