DIP: Por organisa evento na Palo Marga pero para responsabel pa evento

ORANJESTAD – Tur hende por   organisa un evento na Palo Marga pero nan mester por para responsabel pa e evento si. Durante di un conferencia di prensa cu a tuma luga na Directie Infrastructuur en Planning (DIP) conhuntamente cu Director di e departamento sr. Haime Croes, Minister   Otmar Oduber a presenta e situacion actual di Palo Marga. Gobierno ta sali for di e punta di bista cu e intencion no ta pa perhudica e deporte di auto di careda, pero esaki mester bay na un forma structura, responsabel y ordena. Pa e motibo aki tur persona interesa pa organisa un careda of evento riba Palo Marga Raceway Park por entrega peticion na DIP pa bin na remarca pa esaki. Semper y cuando e persona cu haci e peticion ta para responsabel pa e evento.

Oduber a splica cu e tereno unda cu tin Palo Marga ta un huurgrond di Gobierno y ta responsabilidad di departamento DIP pa percura cu esnan cu ta carga responsabilidad eyriba ta percura pa e seguridad na momento cu tin evento na e sitio. Pa esaki Oduber a enfatisa cu tanten cu no tin ningun hende no asumi e responsabilidad aki, ta Pais Aruba y DIP como esunnan encarga ta esun cu ta carga e responsabilidad. Durante e ultimo añanan no tabatin un hende cu ta para responsabel pa e pista, niun hende tabata paga e huurgrond cu ta di Pais Aruba, y pues ningun hende  ta parando responsabel pa locual cu ta sosode na Palo Marga Raceway Park. 

Recientemente un situacion a tuma luga unda cu despues di control tabatin un gran cantidad di criadero di sangura na e sitio, cu por a bira epidemia pa Pais Aruba. Buscando e persona responsabel pa esaki y pa e limpiesa a resulta cu ningun persona ta carga e responsabilidad pa e sitio. Y pues mientras cu e ta un tereno di Gobierno, ta Gobierno ta esun cu ta keda responsabel si algo mester pasa, y no por sinta warda pa algo sosode pa despues lamenta. Cual te na e momentonan aki ningun persona ta cargando responsabilidad di uzo di e sitio.

Gobierno y DIP ta habri pa tur hende cu kier organisa evento, semper y cuando esaki ta sosode na un forma structura y cu ta garantisa siguridad na tur cu ta asisti e evento.