Minister: Areglo di VUT tambe ta un medida pa reduci gasto di personal

ORANJESTAD – E re-introduccion di e areglo di VUT (introduci na aña 2000), mester funciona como un di e medidanan pa reduci gasto di gobierno. Asina minister di finanza Angel Bermudez ta reacciona na NoticiaCla.com riba e pregunta di con tin pensa di reduci gasto den e aparato gubernamental. E areglo mester conduci cu centenares di ambtenaar lo por bandona gobierno otro aña. Por lo menos esaki ta e pensamento di minister di finanza Angel Bermudez. Ta dificil pa pone un cifra di cuanto hende exactamente lo bay, aunke cu rapportnan den pasado a bisa cu mester papia di entre 500 pa 1000 hende cu mester retira pa por sanea e parti aki. Sinembargo, gobierno no por a duna un cifra exacto di hende cu lo por retira, sino solamente ta papia di ‘algun centenares’.

Siman pasa y e siman aki tin anochinan informativo pa esnan interesa y e interes ta hopi grandi segun e mandatario. Ta unabes cu esnan cu registra haci esaki den realidad, por haya sa cuanto hende ta interesa. Segun e mandatario, tin intendi cu un grupo inicial di 200 hende ta interesa den e asina yama ‘overgangs regeling’ pa esnan cu kier haci uso di e cambionan nobo na vigor pa bay cu e ‘vervroegd pensioen’.