Aruba Birdlife Conservation contra proyecto hotelero Seroe Colorado

ORANJESTAD – E instancia no gubernamental (NGO) ambiental Aruba Birdlife Conservation (ABC) ta un di e NGO'snan cu ta publicamente contra e proyecto hotelero na Seroe Colorado. Despues cu e NGO Rainbow Warriors a vocifera nan mal contento, a sigui ABC. Den un email cu a cay den man di NoticiaCla, nan ta mustra cu nan a keda sorprendi di lesa riba NoticiaCla di e proyecto siman pasa. “Algun rato despues di a nota e publicacion riba NoticiaCla, nos (y otronan) a haya e EIA (rapport di impacto ambiental) riba e proyecto Baby Beach Hotel” ABC ta sigui bisa. Y basa riba e hecho cu falta hopi informacion, manera ken e desaroyadornan ta, no tabatin tempo suficiente pa NGO’s analisa e rapport, ABC a bisa cu nan ta ‘rechasa’ tanto e proyecto como e rapport ambiental. 

KEHO

“Tanten cu nos no conoce ningun di e companianan aki, y nos por conclui solamente cu no tabatin un proceso den cual publico y e NGO’s relevante a haya un chens serio di participacion, ABC ta rechasa e EIA (e rapport ambiental) y e proyecto aki”” nan a bisa. Nan ta mustra cu den un gobierno cu ta pretende di ta halto riba integridad y transparencia, no tin lugar pa un conducta hopi cuestionabel y no professional. Ta mustra cu e tesoronan cu ta pertenece na comunidad di Aruba, merece un standard di conducta ma halto pa esnan cu ta simplemente forzando e proyecto aki riba e muchanan di Aruba.  “Un gobierno transparente ta rekeri participacion oportuno  y participacion comprometi di NGO’s relevante y stakeholders, pero esaki ta totalmente ausente”, ABC su email ta sigui bisa. 

ODUBER

Mientrastanto for di dialuna caba, minister di infrastructura Otmar ODuber a condena e actitud di ABC, indicando cu nan ta para na banda y no ta aparece na reunionan pues nan mester ta mas serio den nan actonan.