DIP: Kita obhetonan si no ta riba kavel delinea sino DIP ta haci’e

ORANJESTAD – Directie Infrastructuur en Planning (DIP)  a informa publico pa locual ta trata e parada di mucha na Oranjestad diadomingo venidero 17 di februari 2019, cu publico por pone stoel y banki dia 17 di februari 2019 desde 12or y mey di marduga.

OBHETO RIBA RUTA DI PARADA DI CARNAVAL

DIP a tuma nota cu prome cu e kavelnan den Vondellaan como tambe na final di Vondellaan, tin obheto poni. Esaki ta conta tambe pa L.G. Smith Boulevard cu a tuma nota cu tin obheto prome, entre e kavelnan. DIP ta haci peticion na tur persona cu a pone cualkier obheto riba tereno publico cu no ta riba e kavelnan delinea cu a otorga cu permiso, pa kita esakinan mas pronto cu ta posibel. Si no kita e obhetonan aki e consecuencia ta cu DIP lo laga kita esakinan.

DIP a informa tambe cu e unico obheto cu por pone ta stoel y banki y mester kita esakinan dibiaha despues di parada y mester laga e luga limpi atras. No ta permiti pa pone bloki, staca, cabuya etc. lo kita esakinan mesora ora di controla.