Hotel completamente bendi ta causa ciere di compania Blue Green

ORANJESTAD – Bluegreen Properties NV a anuncia cierre di nan operacion na Aruba dialuna, causando retiro na 42 trahado. Esaki ta e compania cu ta bende timeshare di La Cabana Beach Resort. Craig Robbins, Vice Presidente di Benta y Mercadeo Nacional pa Bluegreen Properties N.V., a splica na tur e empleadonan cu mester a tuma e decision dificil di sera e operacion di Benta y Mercadeo na La Cabana Beach Resort and Casino na Aruba, cual lamentablemente ta afecta 42 cupo di trabou. Tur cupo actual di trabou lo wordo elimina. Bluegreen Properties N.V. ta operando un operacion di Benta & Mercadeo na Aruba desde 1999, enfocando riba e benta y mercadeo di unidadnan di timeshare den La Cabana Beach & Racquet Club.

Segun e compania, nan a acerca e Mediador di Gobierno y representantenan di e sindicato pa papia tocante e situacion actual. “Nos a reuni tambe cu e minister di Labor y a informa e Director di e Departamento di Labor. Nos lo sigui keda den contacto cu e empleadonan y traha cu nan durante e transicion dificil aki” Robbins a sigui bisa. Bluegreen Properties N.V. a anuncia tambe cu nan lo sigui mantene un presencia na Aruba. Nos lo tin 2 Representante di Doño di Bluegreen pa asisti e doñonan local di Bluegreen como tambe e doñonan cu ta viaha pa Aruba pa disfruta di nan timeshare di Bluegreen.  

Mientrastanto e mandatario di Labor a mustra su disgusto riba e situacion aki. "Retiro di 42 persona trahando na Blue Green sin tin un motibo valido, no ta acceptabel", tabata palabra di Minister di Labor drs. Paul Croes. . E mandatario a scucha tur partido den esaki. "Primeramente mi a scucha mr. Craig Robin cu ta Vice Presidente di Blue Green. Den e informacion recibi aki a mustra cu e decision drastico aki ta pa motibo cu e inventario di La Cabana a wordo bendi pa mas di 90%. Den un carta di e compania aki dirigi na mi persona mi a haya e informacion aki. Mi ta lamenta e caso aki, como cu ta trata di trahadornan local cu a dedica nan bida ta bende pa e propiedad aki", Minister a bisa na fin di e reunion.

Mesora Croes a tuma contacto cu Presidente di STA Diego de Cuba pa asina scucha e posicion di STA den e caso aki. For di diabierna ultimo Minister Paul Croes a reuni cu Mediador di Gobierno y tambe a pidi e trahadornan pa keda den contacto continuo cu su persona. E trahadornan a mustra hopi de satisfecho den e forma cu a deal cu nan den e caso aki, y ta sinti cu ta trata aki di represalia pa motibo cu nan e afilia na un sindicato. "Si esaki ta e caso tampoco ta corecto. Forma parti di un sindicato ta un derecho di cada trahador y esaki ta mara den nos leynan tambe", Croes a informa e trahadornan.

Di otro banda por menciona cu si enberdad e inventario di La Cabana ta casi bendi completamente esaki ta un noticia bon pa locual ta e calidad di puntonan bendi pa Aruba. Locual no ta cla, ta cu e forma cu ta bende time-share awendia ta a basa ariba "pointsystem" cu no necesariamente ta significa cambernan di La Cabana specificamente. Gerencia ta keda para riba e punto aki y trahadornan ta keda cuestiona e motibo aki. Minister Paul Croes di Labor a encarga un team special di Departamento di Labor pa atende e trahadornan debidamente. "Nos ta para banda di boso den esaki. Pa mi como Minister pero tambe como Arubiano esaki mi ta lamenta di mira mama y tatanan ta perde trabou asina aki", Minister Croes a bisa.