SETAR a bishita Abraham de Veer School pa projecto di Hack-A-Thon

ORANJESTAD - Manera ta conoci, SETAR a lansa un projecto “Island of the Future - Agriculture” den un concepto Hack-A-Ton, den cual a invita varios scol secundario pa forma parti di dje. Den e projecto único aki, 6 scol a acepta e reto di hasi un projecto di agricultura, unda e meta ta pa e isla por bira ‘self sustainable’ y alaves crea interés den e muchanan pa nan tambe planta nan mesun berdura na cas. Awor ta asina leu cu SETAR su team ta bishitando e diferente scolnan participando pa mira con nan projecto ta canando. E siman aki a toca turno di Gen. Maj. Abraham de Veer School cu ta un di e scolnan participante cu un team di 7 mucha.

Na Abraham de Veer School e team ta consisti di muchanan klas 2A y 2B bou di guía di Meneer Leest, ta bezig cu nan sistema di plantación riba beton den e cura di scol. 

Prome paso cu nan a tuma ta dicidi riba e tipo di plantación cu nan lo bai enfoca ariba. E decision a cai riba crecemento di boonchi via e sistema Hydroponic. Mientras cu e team ta traha riba nan “Green House” den nan oranan liber, nan a cuminsa pone e simiyanan fermenta. Nan a consulta varios cunukero riba conseho pa ki sorto di mata of simiya ta bon y fácil pa planta. Adicionalmente nan a haci investigación online riba YouTube y Google pa sa mas di agricultura.

Nan a dicidi riba boonchi. Tambe a pensa riba nutrientenan cu tin cu agrega na e awa di kranchi cu nan ta bai usa pa asina e mata crece bon. E alumnonan participante mes a constui nan “Green House” riba tereno di scol, y a usa varios materialnan recycla pa laga e matanan crece aden. Tur nan pasonan cu nan ta hasiendo actual ta wordo documenta dor di e alumnonan nan mes, pa por presenta esaki na final den un presentación y cu un website. SETAR ta contento pa wak dedicación y enthusiasmo riba projecto cu nan hasiendo pa nan scol y cu tur nan preparación ta bayendo hopi bon. SETAR ta sigui bishita e scolnan pa mira nan projectonan. 

E scolnan cu a registra pa participa na e projecto aki ta: Gen. Maj. Abraham de Veer School, Colegio San Augustin, Mon Plaisir College, EPB San Nicolas, Colegio Arubano Oranjestad y Maria College. Riba e potretnan por mira e grupo di studiante di Abraham de Veer School y varios etapanan di nan projecto.