Arends: No ta momento awor pa gobierno ‘play tough’ cu CAFT
ORANJESTAD – " No ta momento awor pa gobierno ‘play tough’ cu CAFT ". Palabra di ex minister y actual parlamentario pa partido AVP Richard Arends na NoticiaCla riba e 'impasse' entre CAFT y Gobierno di Aruba. Si gobierno di Aruba no cumpli cu e colegio di supervision financiero CAFT, e siguiente carta cu lo sali ta pa Conseho di Minister di Reino. Asina p Arends a bisa NoticiaCla como reaccion diaranson riba e situacion tenso cu tin entre gobierno y CAFT actualmente. Segun Arends, e ta reacciona como partido AVP y parlamentario pa e partido. Diamars atrobe tabatin intercambio di carta entre gobierno y CAFT unda cu ambos ta acusa otro di no ta actuando corecto. Y segun Arends, si mira e liña di carta, esaki ta e ultimo carta di CAFT prome cu nan bay pa esun unda cu ta recomenda un ‘instruccion’.
DI TRES CARTA
Segun Arends, den e di tres carta cu Gobierno ta ricibi di CAFT (cu ta riba e mesun puntonan), e colegio kier mas claridad den ehecucion di SCP, plan di inversion, no tin un reduccion genuino di gastonan di personal y gastonan di aparato gubernamental ta sigui aumenta. “ Gobierno ta nenga di duna e informacion necesario pa por hasi e supervision manera cu Gobierno mes a palabra den e ultimo protocol” Arends a bisa. “Gobierno mes ta escalando e situacion, pasobra e siguiente carta cu lo sali si Gobierno no cumpli ta un carta pa RMR”. Segun Arends, e ta spera cu sano juicio prevalence cu cu Gobierno sa si duna e splicashon necesario. “ No ta momento di play tough: ta un mandatario no ta kita bo obligacion di cumpli cu loke bo mes a palabra cune”.
CULPA DI AVP Y CAFT
Arends ta insisti cu ta gobierno actual ta esun cu a aumenta e gastonan. “ Nos no a aumenta gasto na 2018 y 2019. Nos no a keda sin aproba jaarrekening 2016. Caft a bisa enfaticamente cu na aña 2018 gastonan a subi cu casi 100 mio y bolbe aumenta na 2019. Avp no tabata den gobierno” Arends a bisa. E parlamentario tabata minister di Economia den e ultimo gabinete Eman, y tabata parti di negosacion pa cu e protocol inicial cu CAFT. Como tal e ta sigura cu e tabata cerca tur e discusionan y ningun momento por papia di culpa di AVP.
A prolonga ciere di frontera cu Venezuela cu cuater luna mas
ORANJESTAD – Ora cu a kere cu awor si ta bay habri frontera cu Venezuela pa e parti maritime, manera tabata indica, dialuna anochi gobierno di Aruba a informa cu un biaha mas ta prolonga e ciere di frontera cu Venezuela, te por lo menos augustus di e aña aki. Frontera cu Venezuela ta cera desde aña 2019, na momento cu Gobierno di Venezuela a cera e frontera unilateralmente. Na mei di 2023 a habri e frontera maritimo basa riba palabracionnan haci entre autoridadnan di Aruba y autoridadnan di Venezuela.
Croes: Ta bay organisa un jobfair pa 45+ y penshonadonan
ORANJESTAD - Minister Glenbert Croes a anuncia cu pronto lo bay organisa un Jobfair specialmente pa pensionado y esnan di 45+. E categoria di edad aki unda tur comerciante y gremionan, hunto cu departamentonan di Labor esta DAO y DPL lo ta presente pa asisti y intermedia unda ta necesario.
Croes: Aruba mester di 9000 trahado e aña aki pa hotelnan nobo!
ORANJESTAD – Un declaracion cu minister di Labor Glenbert Croes a haci dialuna atardi via un comunicado di dje, a hala atencion den dialuna atardi relaciona cu e tema di labor den sector hotelero. Esaki pasobra e la declara den e comunicado textualmente cu ‘manera ya ta conoci, e aña aki lo tin 3000 camber di hotel adicional ta habri’. Pero e declaracion cu mas a hala atencion ta e hecho cu segun e mandatario “ Ta bay tin mester di por lo menos 9000 trahado pa e hotelnan aki por opera y duna e servicio optimal cu nan ta desea”. Esey tambe ta un citado directo di e comunicado. Y e mandatario ta cita ‘ segun indicacion inicial’. Mester bisa si mesora cu e base di e comunicado tabata pa anuncia cu ta bay tin un job fair pa pensionado y persona di 45+. Y ta den e comunicado, e informacion ariba menciona ta aparece tambe.
Figaroa: Proximo gobierno mester consisti di solamente vakministers
ORANJESTAD – E lider politico hoben di e partido politico Direccion Politiea Leonardo Figaroa , ta pensa cu den e proximo gobierno, e lidernan politico di e partidonan den coalicion no mester bira minister sino bay den Parlamento. Y mester forma e gobierno cu solamente 7 minister y tur mester ta vakminister, esta no politico. Cu esaki, Leonardo ta pensa cu mester ‘kibra tradicion’.
Minister na Merca ta lobby cu banconan pa fia 160 miyon dollar
WASHINGTON – Minister di finanza di Aruba Xiomara Maduro a cuminsa lobby cu varios banco Mericano e siman aki, pa logra haya un fiansa di 160 miyon dollar. E mandatario a confirma cu e ta na Merca pa ‘atende e IMF Spring Meetings na Washington DC’, unda cu e ta ‘probecha pa reuni cu diferente banco pa por haci e preparacionnan necesario pa Aruba por subi mercado internacional pa por cubri e necesidad financiero di Aruba’. Algun di e banconan cu e mandatario a lobby cu ne pa purba haya fianza, ta JP Morgan, Standard Charter, Citi Group y Santander. Durante e lobbymento, e tin cu convence e institutonan financiero di tur loke ta pasa na Aruba y pa prueba cu Aruba tin un ‘stabilidad financiero cu ta brinda e confiansa na inversionista’. Segun e mandatario, e ta un suma cu ta wordo ‘refinancia’ di e debenan internacional existente cu ta madura. ‘ Como ta refinancia, esaki no lo crece e debe di Pais Aruba’, e mandatario a sigura bisando.
Wever: Fin di di dos cuartaal 2024, centro di Oranjestad ta haya mas luz
ORANJESTAD - Despues di e instalacion inicial di 50 luz aña pasa, ta intensifica e esfuerso pa mehora e visibilidad y seguridad den nos centro di ciudad cu instalacion di 100 palo di luz adicional nobo den nos centro di ciudad. E proyecto aki ta parti di e strategia holistico di revitalisacion di Oranjestad pa crea un ambiente mas sigur y atractivo pa tur su habitantenan, bishitantenan y empresarionan.
Follow NoticiaCla
