Gobierno di Aruba ta reuni cu ehecutivonan di Citgo e siman aki

ORANJESTAD  Gobierno di Aruba ta reuni cu Citgo e siman aki segun un comunicado di gobierno. No ta conoci exactamente cu ken di Citgo, pero ta mas probable cu lo combersa cu e hefenan di Merca. E tema sigur lo ta e.o. e efecto di sancionan impone reciente pa Merca riba PDVSA. Wever mes a confirma cu e sancionnan recien cu Merca a impone riba PDVSA tin su impacto riba e trabounan na e refineria. “ Y e siman aki ehecutivonan di Citgo lo ta na Aruba pa duna mas informacion na gobierno” Wever a sigui bisa den e comunicado. Ultimo biaha cu tabatin reunion di nivel aki, e hefe grandi Asdrubal Chavez mes a bin Aruba pa e reunion aki. 

VENEZUELA

 Nos pais bisiña Venezuela ta enfrentando momentonan hopi crucial pa e pais. E mandatario a referi e manifestacionnan grandi cu tabatin ayera (diamars) na e pais bisiña. Mientras tanto, Gobierno di Aruba ta sigui vigila e situacion di cerca mientras cu tambe ta ricibiendo informacionnan di e desaroyo di loke ta pasando na Venezuela. Wever-Croes a indica cu e suministro di gasolin y fuel pa consumo local ta sigura y no ta motibo pa preocupacion. 

CONTACTO CU MERCA

Wever-Croes: “Mi ta den contacto cu autoridadnan Mericano na Washington tambe y ta haciendo tur loke ta den nos alcance pa e situacion dificil y tenso entre Merca y Venezuela no tin un impacto grandi na Aruba. Nos ta keda cu fe cu pronto tin un solucion”.

CONFERENCIA

Mientrastanto siman pasa tabatin un conferencia di prensa di Refineria di Aruba (RdA) unda cu e director Alvin Koolman a bisa cu no tin intencion pa Citgo bandona Aruba, pasobra e ta un bon cos pa Venezuela. De hecho, a bay asina leu di bisa cu si Juan Guaidó bin na mando, esaki lo ta mihor pa Citgo, ya cu esey ta elimina e sancionan, ya cu cu e presidente actual Maduro, tin sancion y e ta limita y dificulta e operacion di Citgo. No ta conoci ki implicacion esaki por tin pa cu e relacion cu Venezuela actualmente, pero e portal aki a comporonde cu autoridad Venezolano, no a keda nada contento cu e declaracionan aki. 

CONSEHO DI BIAHE

Mientras, Gobierno di Aruba ta enfatisa e conseho di biahe pa Venezuela ta keda mescos. No biaha pa Venezuela si realmente no ta necesario. Gobierno di Aruba ta vigila e desaroyonan di cerca y lo duna mas informacion si y ora ta necesario. NOTA: E potret ta uno di archivo y no ta implica cu e reunion e siman aki lo ta cu e mesun persona.