Ruiz: CAFT ta strobando gobierno di Aruba di goberna!

ORANJESTAD – CAFT ta strobando gobierno (di Aruba:red) di goberna. Esey tabata e prome reaccion diamars anochi di Minister di Finanzas Xiomara na NoticiaCla riba e di tres carta di CAFT manda (y haci publico casi simultaneamente) pa gobierno. Den e carta di CAFT nan ta reclama gobierno cu ‘ainda’ e no ta dunando e colegio di supervision financiero suficiente informacion. Ruiz a desmenti esey, y ta bisa cu e kier sa cu tin un hende den CAFT cu ta buscando un ‘issue’ cu gobierno di Aruba. “Nan ta bezig cu otro motibo” Ruiz a bisa, indicando cu e loke cu CAFT ta haciendo tin ‘algo su tras’. 

PUBLICO

E mandatario ta haye straño cu e ta haya un carta di CAFT cu un deadline, mientras cu prome cu e haya chens pa reacciona ariba, ya e carta ta poni online, manda pa parlamento y prensa, cu ta pone pensa cu tin algo su tras. “CAFT no ta drechi bezig” e mandatario a sigui bisa. 

ISSUE

Segun Ruiz, tin dos asunto den e ultimo carta, cu CAFT ta buscando informacion, cu ta e parti di reforma fiscal, y e maneho di dividend. Pa e prome, Ruiz ta mustra cu CAFT mester compronde cu e reforma tin 4 fase, y dificilmente por delanta e trabou di tur e fasenan. No ta posibel segun Ruiz pa duna informacion cu no ta disponibel y CAFT tin cu compronde esey. Pa loke ta e parti di e maneho di dividendo, el a sigura e portal aki cu el a splica nan di e proceso y e practica. 

AANWIJZING

Reaccionando riba e parti cu posiblemente CAFT ta buscando un aanwijzing, Ruiz ta haya lamentable cu ta buske a base di e informacion aki cu segun Ruiz, no ta necesario. Si CAFT tabatin mester di cierto informacion, pakico no a puntra e mandatario e momento cu e tabata cu nan, y ta opta pa bay critica publicamente. 

FORMA DI COMUNICA

A splica e portal cu e no ta compronde con CAFT kier pa e comunica cu nan, pasobra manera cu e ta comunicando ta e forma corecto. E kier e ora pa CAFT mustre e manera corecto. Aparentemente CAFT no kier hacie amtelijk mas (bay haya informacion di tur departamento pasando departamento pa departamento) pero kier haye straight di minister.”Ba sinta tur caminda, (pues) con bo kier men cu nos no ta comunica?” Ruiz a puntra den direccion di CAFT. 

INTENCION DI CAFT

Atrobe, Ruiz ta splica e portal aki cu mirando con e cos ta bayendo, tin un hende den CAFT cu ta buscando un issue. E mandatario a usa e dicho popular Hulandes, pa splica esaki. “Spijkers op laag water zoeken” ta loke cu CAFT (of por lo menos un persona den CAFT) ta haciendo segun e mandatario. E dicho traduci, kier men, cu un hende ta ‘zeur’, y ta busca problema riba cosnan chikito pa haci algo grandi di dje. E mandatario a finalisa bisando e portal aki cu lo contesta CAFT, y diabierna mainta e ta topa e colegio personalmente pa papia cu nan.