CAFT a bolbe hala orea di Gobierno di Aruba pa mas informacion

ORANJESTAD – Tres dia prome cu nan topa cara cara pa nan reunion planifica di cuartal, pa medio di un di tres (y posibel ultimo:red), e colegio di supervision financiero di Aruba CAft a reclama gobierno di Aruba diamars cu nan (gobierno: red) no ta dunando e colegio suficiente informacion ‘atrobe’ pa nan (CAFT:red) por haci nan trabou referente control di e presupuesto 2019. Minister di Finanza Xiomara Ruiz a reacciona riba e di 2 carta, cu ‘Caft sa unda cu e tin cu haya e informacion necesario’ y cu nan (gobierno: red) a duna suficiente informacion. Cu e di tres carta, usando articulo 11, inciso 5 di Laft, e colegio a cuminsa e trayecto pa informa Conseho di Minister di Reino pa un posibel conseho negativo contra Aruba cu por desemboca den un ‘instruccion’. Gobierno a bolbe haya 2 siman di tempo (e ta vence 26 di februari 2019) pa reacciona positivamente cu suficiente informacion. 

FALTA DI INFO

E liña cora den e carta ultimo di 4 pagina diamars, ta cu CAFT ta reclama cu gobierno (ainda) no a cumpli ‘suficiente’ cu e recomendacionan haci. CAft ta mustra e.o. cu ainda nan ta falta informacion crucial pa por determina e nivel di realidad di e presupuesto 2019. No solamente esey, pero tambe cu e forma cu gobierno kier y ta comunicando cu CAFT, ta robez. CAFT ta mustra cu gobierno tin cu cumpli conforme e rekisitonan legal manera stipula den e ley di Laft y e comptabiliteitsverordening. NoticiaCla a compronde cu gobierno no ta cumpliendo cu esaki ora di contesta, y ta mas bien teniendo un liña di corespondencia cu no ta cuadra cu e ley. “Bo reaccionan formal mester conta cu tur informacion relevante y segun prescribi pa ley, esta e hustificacion” Caft ta reclama e mandatario encarga. “Posibel informacion adicional mester bay pa CAFT tambe segun e caminda formal”. E portal aki a compronde pues cu esey no ta sosodiendo y cu posiblemente e vianan cu e mandatario ta usando, no ta esun corecto pa informa CAFT.  “Contrario na loke e minister ta indica, CAFT no ta den poder di un splicacion pa e ley (presupuesto) aki. Como tal CAFT no por controla e presupuesto di e crisis social, y su posibel efectonan riba e presupuesto di pais Aruba.  Conforme articulo 11, inciso 5 di e LAft, CAFT ta pidi e minister pa dentro di 14 di informa hasta ki punto y den ki forma gobierno lo tene cuenta cu e carta aki di CAFT. “ E reaccion formal aki lo mester ta acompaña cu tur documentacion necesario cu ta necesario pa un hustificacion adecua” e colegio a sigui bisa. Por nota cu e colegio no ta nada contento cu e reaccion di gobierno y cu un eventual fayo mas, ta suficiente pa CAFT bati na porta di Conseho di minister di Reino, cu e conseho pa un instruccion. 

MINISTER 

E minister, anticipando un posibel continuacion di parti di CAft, basa riba netamente e pregunta di NoticiaCla, cu si CAFT no ta contento cu e ultimo contesta, cu si nan dicidi di bati riba porta di Conseho di Minister di Reino, kico e mandatario por haci. El a contesta e ora cu nan (gobierno:red) lo bati tambe riba e mesun porta di e conseho di minister di Reino, ya cu e ora e ta bira un asunto politico. “El politico aqui soy yo!” tabata e forma con e mandatario a splica e situacion den un lenguahe pa tur hende compronde. Caft no ta politico, pues e no mester sinta riba stul di gobierno y e mester e ora laga politiconan bringa e asunto aki mas leu. Tur cos ta mustra cu esaki lo bira un ‘showdown’ entre gobierno di Aruba y Hulanda, si aworaki gobierno no ‘cumpli’ den wowo di CAFT. Lesa e carta ultimo AKI.