Investigacion forensico riba declaracionnan specialistanan medico

ORANJESTAD - Relaciona cu un mensahe di posibel iregularidadnan riba tereno administrativo di parti di specialistanan medico cu ta traha den sala di operacion di hospital, NoticiaCla.com a compronde cu AZV a duna un experto independiente e tarea pa investig’e. E investigacion ta wordo haci door di Forensic and Compliance Services NV di Corsou y ta trata e manera con e specialistanan cu ta opera (snijdende specialisten) a regla nan reemplazo. Specialmente riba e parti financiero ora un specialista cu ta traha riba su mes ta reemplaza un specialista cu ta den servicio di hospital y vice versa. Den caso cu e investigacion ta mustra cu tawatin iregularidadnan, pasonan necesario lo wordo tuma. AZV ta spera cu aki un par di siman e investigacion lo ta finalisa.

Tabata siman pasa cu ex minister di salud y actual lider di su partido politico UPP, Booshi Wever a haci e pregunta publico den direccion di AZV. Segun Wever varios luna pasa a yega na su conocemento cu actonan contra ley y contra etica medico, comparabel cu loke e specialista Lacle a comete den pasado, a ser haci door di un of mas specialista cu ta traha den OK di HOH.

“Mi a haci e minister Schwengle varios biaha e pregunta si ta berdad esaki y si tin un investigacion ta tumando lugar al respecto, y lamentablemente nunca mi a haya un contesta riba esakinan” Wever a sigui bisa. Segun Wever, un di e specialistanan cu supuestamente lo ta envolvi, a ser poni como director interino di HOH door di e minister aki. “ Y segun mi por a compronde, e minister a ser poni na altura cu tin un investigacion al respecto. Ta un berguenza cu un minister ta apunta un persona - cu supuestamente ta bow investigacion - den un posicion asina clave, particularmente ora cu un di e tareanan ta pa percura cu mediconan no ta cobra di mas cerca AZV” Wever a bisa.

Segun Wever, ya cu e no a haya un contesta ni reaccion di minister, ni tampoco di e Hunta di Supervision di HOH, e kier haci un otro intento, awor cerca AZV, pa haya sa si ta berdad cu tin un investigacion a, of ta tumando lugar riba e asunto aki. “ Pasobra ta inaceptabel cu di un banda nos pueblo ta bay wordo masacra cu medidanan asina drastico door di AZV, mientras cu di otro banda, nos tin un of mas specialista ta haci maluso di AZV, y ta "get away" cu ne tambe.” Wever a sigui bisa.

“Mi ta spera cu pronto AZV bin dilanti cu informacion al respecto. Tempo di actonan incorecto di dr. Lacle y otronan, tur cos a wordo poni den publicidad, pues mi no ta compronde dicon awor tin tanto secrecia rond di esaki” Wever a finalisa di bisa.