Ponson: A duna NGO’s un siman pa reacciona riba hotel di Seroe Colorado!

ORANJESTAD – Bo no por manda un documento pa un NGO y exigie pa e wak e den 7 dia pa duna comentario. Asina presidente di Rainbow Warriors Milton Ponson a bisa NoticiaCla diamars riba e asunto di hotel na Seroe Colorado. Ponson ta cuestiona e minister encarga cu medio ambiente, Otmar Oduber cu a sigura cu NGO’s nan a keda bon informa, contrario na antes unda cu no tabata oblige pa scucha e NGO’s riba e Mer rapport. Ponson ta sigura cu berdad nan a haya e MER rapport di e proyecto di 900 camber na Seroe Colorado, pero e forma aki no ta manera di traha. Oduber di su banda, ta argumenta cu NGO’s mester ta serio si ora cu nan critica. 

A INFORMA NGO

E mandatario dialuna ultimo a sigura NoticiaCla cu contrario cu pasado, e biaha aki a exigi di e desaroyadornan, pa no solamente traha e rapport di medio ambiente pero tambe inclui esaki pa e NGO’s envez di haci esaki como simplemente un rekisito sin cu NGO’s ta haya un bista ariba. Ora cu NoticiaCla a confronta e mandatario cu e hecho cu algun NGO a mustra nan desaprobacion pa e proyecto, Oduber a reacciona bek. “Mi por sigura nan cu nan voz ta wordo scucha” ODuber a bisa. “Pero, bo mester ta serio si tambe. Y mester participa y bo mester participa na un forma serio. Pasobra un di e criticanan grandi cu tin riba cierto NGO’s, den caso di ROP, nan ta prefera di para critica den Facebook of medio di comunicacion, pero nan no ta bin sinta den reunion y duna nan opinion” Oduber a bisa. Den e caso aki segun Oduber, a invita e NGO’s nan aki, y nan a laga sa cu si nan no haya e documento, nan no ta bin reunion. “Anto e ora bo mes ta exclui bo mes” Oduber a bisa. E ta referi na dos pa tres NGO’s cu no kier participa. 

PONSON

Ponson a critica e forma con cos a bay, y tambe e falta di transparencia. E falta aki e ta midi den e forma con no por a bin afo y bisa ken exactamente e desaroyadornan ta, sino unicamente bisa cu ta trata di stranheronan. Ora cu a bay wak, a nota cu ta tres persona cu ta desconoci, localmente ta inscribi na Camara di Comercio via 3 diferente oficina di Real Estate. Segun Ponson, lo no ta straño cu ta trata di Venezolanonan Chavista cu kier saca nan placa y ta bin Aruba pa traha e proyectonan aki. Un cos ta sigur, cu Rainbow Warriors no ta contento cu ningun di e ultimo tres proyectonan hotelero presenta pa e gabinete aki.