Ruiz na CAFT riba crisis plan: ‘El politico aqui soy yo!’

ORANJESTAD – C(A)Ft no ta un organo politico, e no mester actua como tal. El politico aqui soy yo!” Palabra di minister di finansa Xiomara Ruiz Maduro, dirigi indirectamente (of directamente:red) na e colegio di supervision financiero dialuna durane e conferencia bisemanal di gobierno. Motivacion pa e dicho aki ta e hecho cu segun Ruiz, e colegio tin problema cu e supuesto intransparencia di gobierno pa cu e presupuesto di e crisis plan social. Y segun Ruiz, e colegio kier haci politica y cuestiona presupuesto di e crisis plan social, siendo cu nan no ta politico.  

KEDA LEU DI E CRISIS PLAN

Si ta pa Ruiz Maduro, e colegio di supervision financiero ta keda leu di e crisis plan social di gobierno. E mandatario no a sconde su disgusto contra e colegio, indicando cu ‘tur 21 parlamentario di pais Aruba a bay di acuerdo pa e fonds aki’, y ademas tin raportahe pa cuartal cu ta bini. Pues no tin ningun motibo pa cuestiona esaki. Y e ta un asunto politico y e ta carga aprobacion politico total di Aruba. 

DISCUSION CU PRUEBA

E mandatario no ta di acuerdo cu mester hiba un discussion na Aruba den Reino cu CAFT. Pa fortifica su punto, e mandatario a trece cifranan di maltrato na Aruba dilanti. Entre otro un grafico cu ta mustra cu 288 mucha pa aña ta wordo maltrata y pa luna esaki ta 24 mucha. “Anto nos ta sinta keto y discuti si e fonds aki ta suficientemente transparente si of no? Ki ora ta suficiente transparente, cuanto nos tin cu wanta”. A sigui cu mas informacion unda cu 1800 muher ta wordo maltrata pa aña na Aruba, casi 150 muher pa luna. Hasta hende a fayece a consecuencia di maltrato. 

NO MESTER CUESTIONA GOBIERNO

“Señores cu tur respet debido, ami no ta kere cu den Reino, na Aruba nos tin cu bay cuestiona un gobierno cu a dicidi di bay atende e asunto akinan”, Ruiz a sigui bisa. “Bo no por manda un robot traha cu hende, pero bo mester manda hende” Ruiz a bisa, pa kico tin cu un social crisis plan. “Mi no ta kere cu CAFT tin e pudor di bisa ‘leuk en wel cu bo tin un crisis plan (pero cumpli cu dunamento di informacion:red), pasobra e ora mi mes lo contesta nan. Mi no ta kere cu mi lo keda hopi netjes” e mandatario a sigui bisa e portal aki. Los di esey, gobierno lo sa di bringa esaki te na Rijks ministerraad si mester. 

CAFT NO A HACI SU TRABOU

“Si CFT a cumpli cu su trabou na momento cu e tabatey na 2015, awe nos no tabata na e situacion aki”. Bo tambe como instancia a faya barbaramente, e mandatario a bisa. No por permiti pa bringa esaki pa ‘un tecnicality’, refiriendo na e hecho cu e colegio di supervision no a actua tur e tempo cu e gabinete anterior, cu a pone cu nos a yega na e situacion actual manera cu e ta. 

CAFT NA ARUBA

E colegio ta na Aruba e siman aki for di diaranson, pa hiba combersacion cu e gobierno y otro instancia. Diahuebs anochi nan ta presenta un lectura riba tema di finanzas duradero, y diabierna tin un conferencia di prensa riba e bishita na Aruba.