Minister Croes: Falta di comunicacion a causa walk out na Sociale Zaken

ORANJESTAD – “Falta di comunicacion a causa e walk out (na Sociale Zaken)” minister di e departamento ey , Paul Croes a bisa NoticiaCla.com dialuna anochi. “ Mi ta hasiendo lo maximo pa alivia Sociale Zaken e situacion cu nan ta aden” e mandatario a sigui bisa. Manera ta conoci e trahadonan a dicidi cu ta pone trabou abou y a bin cu dos punto principal cu ta airconan cu no ta funciona y e oficina sera na San Nicolas.

Croes a splica cu e la reuni cu e trahadonan y a splica cu lo prepara un presupuesto pa presenta na Minister raad pa haya aprobacion financiero cu mester regla e asunto aki. Pa loke ta e asunto di oficina sera, e mandatario tambe tabatin un solucion. E situacion di oficina (sera) na San Nicolas ta cu for di april 2014 e servicionan na San Nicolas a wordo sera pa motibo cu e edificio a wordo afgekeurd. “ Wel mi decision riba esaki ta cu nos lo bai bek e oficina na San Nicolas. Oficina San Nicolas lo wordo habri bek, pa sirbi e pueblo eynan tambe” Croes a bisa. “ Esaki lo causa menos presion pa e cantidad di personal na Playa”. Segun e mandatario, e edificio a conoce un limpiesa grandi y profundo y DOW kier a hasi algun cos chiquito mas pa hasi e edificio operacional. “Den menos di 1 luna lo tin solucion pa esaki, e mandatario a sigura NoticiaCla.com. "Mi ta un minister cu ta preocupa pa salu di mi trahadornan y pa departamento di asuntonan social esaki no ta un excepcion” e mandatario a declara finalmente na NoticiaCla.com.