Gobierno lo controla y tuma terenonan otorga cu no ta den uzo bek

ORANJESTAD - Gobierno lo controla terenonan otorga cu no ta den uzo. Asina minister di infrastructura Otmar Oduber a anuncia dialuna mainta durante conferencia di prensa. Segun e mandatario, ta exactamente 1 aña cu Ministerio di Desaroyo Teritorial, Infrastructura y Medio Ambiente y Directie Infrastructuur en Planning (DIP) a anuncia e maneho nobo, habri y transparente pa otorgamento di tereno comerical y residencial. 

TERMINONAN

Den cuadro di esaki a pone terminonan pa e terenonan aki wordo desaroya. Considerando e ‘gewoonterecht’ crea durante añanan pa motibo cu den pasado no tabatin terminonan stipula pa construccion tuma luga, e terenonan tabata keda habri (sin desaroya) pa hopi tempo. A pone un periodo transitorio di 1 aña pa e diferente casonan aki, pa cual considerando cu e aña awor a pasa ta cuminsa implementa e maneho nobo aki riba tur cu ta ocupa terenonan cu ta pertenece na Pais Aruba. Minister Otmar Oduber ta splica e proceso aki.

CONTROL

Durante di e Conferencia Oduber a anuncia cu control lo inicia riba tur tereno cu no ta wordo uza na e momentonan aki of cu no a wordo uza cu e destino poni den e contract cu nan tin cu Gobierno. E grupo aki lo ricibi notificacion for di DIP, indicando cu nan no ta den cumplimento cu e condicionnan poni den nan ‘erfpachtsvoorwaarde’. Cual ta significa cu Gobierno lo por pidi e terenonan aki bek cu pa hopi aña no a wordo desaroya/ construi conforme e acuerdonan haci. Importante pa personanan sa cu den e acuerdonan ta indica cu construccion di por ehempel un cura rond di e tereno of door di rosa e tereno, cu esakinan no ta considera como construccion. 

RESUMEN

Pa resumi, desde 1 februari 2019 e aña transitorio a termina y lo mira cu mas y mas carta lo wordo dirigi di parti Gobierno/ DIP na e grupo (comercial of residencial) cu no ta cumpliendo cu condicionnan poni den nan contract. Pues si no cumpli cu e ‘erfpachtsvoorwaarden’ cu ta encera cu dentro di tanto tempo mester cumpli y / of finalisa e proyecto. Gobierno tin e derecho pa bisa cu e propiedad ta wordo tuma over bek pa Pais Aruba, Minister Oduber a finalisa.