Aki 6 luna cannabis medicinal por ta legal pa uso na Aruba

ORANJESTAD – Si tur cos cana su  caminda corecto, aki 6 luna Aruba por cuminsa atende cu Cannabis Medicinal legalmente. Asina minister di Salud Dangui Oduber a bisa den e conferencia di prensa semanal. Cu esaki ta cumpli tambe cu e plan di gobernacion cu tabata encera netamente esaki, esta legalisacion di cannabis medicinal. Dialuna el a anuncia cu e proceso di legalisacion a cuminsa. Mes momento a sigura cu tin mechanism na lugar pa controla e maneho y tambe a sigura cu esaki no ta un ‘springplank’ pa legalisa cannabis recreacional. 

KI TIPO DI CANNABIS

Segun Oduber, lo atende cu e proceso aki den diferente fase. E prome fase ta e legalisacion di e asina yama CBD oil, e CBD capsule y CBD crème. E CBD ta wordo usa na momento di sufrimento di diabetico, di depression, stress, epilepsia y artritis. E CBD oil tin un THC gehalte hopi abou. Lo apunta esaki como un suplemento. E siguiente paso lo ta pa apunta un CBD cu un thc gehalte mas halto, e dosis mas halto cu ta wordo usa no como un suplemento, sino un remedy. Esaki ta pa e.o. hende cu ta sufri di cancer. E efecto ey ta mas halto. 

CONCEPTO DI LEY

Na e momento aki tin un concepto di ley cu ta cla caba, cu tin cu wordo adapta sinembargo. Ta trata di dos ley cu tin cu wordo adapta, cu ta e Landsverordening Geneesmiddelen, pa asina por apunta e CBD como un suplemento. E otro ley cu mester keda adapta ta den concepto na directie wetgeving cu ta Landsverordening Verdovende middelen. Esaki pa apunta e uso di cannabis como un remedy. Tur dos fase ta cana simultaneamente, y ta premira cu dentro di 6 luna e proceso completo ta cla pa bira un realidad. 

PLANTA BO MESUN CANNABISE intencion pa bo mes planta cannabis y usa esaki pa consumo propio lo no existi debi na e mechanismo cu ta na su lugar pa evita esaki. Despues e mandatario lo bin bek riba e parti aki.