Oduber: Desaroyadornan pa proyecto Seroe Colorado ta internacional

ORANJESTAD – Aunke e mandatario responsabel pa e cartera di infrastructura Otmar Oduber no tabata dispuesto pa informa ken exactamente e desaroyadornan di e Proyecto hotelero di Baby Beach ta, a confirma pa NoticiaCla dialuna mainta cu ta trata di un consorcio di financiadornan internacional. E mandatario no ta haya corecto pa divulga e informacion ey, pero si a bisa cu Aruba Investment Bank ta e banco di nan. Tambe tin suficiente hende na Aruba pa traha na e hotel, cu no mester inverti mucho hende di exterior. 

INVERSIONISTAE pregunta cardinal ora cu NoticiaCla a publica e informacion inicial siman pasa tabata, ken ta e desaroyadornan. Segun e rapport den poder di e portal aki, tabata trata di un compania Real Estate ta mara na dje, pero no ta conoci ken exacto esaki ta. E mandatario riba pregunta di e portal aki, tabata solamente dispuesto pa bisa cu ta trata di un grupo cu tabata pertenece na un otro grupo, pero cu a cambia y awor a forma otro consorcio pa por financia e proyecto aki. 

EMPLEO

Pa loke ta empleo, e minister a usa cifranan di un otro hotel, Ritz Carlton pa mustra su punto cu trahado no mester ta un problema pa e hotel. A splica cu ora cu Ritz Carlton a bin Aruba y a cuminsa opera, di un total di 600 pico trahado, ta apenas 6% ta trahado cu permiso. Como tal, e ta sigur cu tin suficiente hende pa traha na e hotel aki. Ademas tin 22% di desempleo y 1200 Arubiano den exterior studiando, cu por bin Aruba pa haci e trabou. 

REFINERIA

E critica di un otro proyecto hotelero cu no kier a bin pa motibo di e refineria na San Nicolas, no ta un problema awor. Segun e mandatario,  no tin ningun ‘issue’ cu e refineria. “Nan no ta importa si tin refineria of no” Oduber a bisa dialuna mainta. Pues contrario na e proyecto hotelero di Bahia Principe, cu de hecho tabata e hotel na e sitio di e proyecto actual, e proyecto di Baby Beach Resort ta bin cu si tin un refineria si of no. 

NGO

Un di e grupo di persona a ricibi e rapport cu ta den poder di NoticiaCla, ta e NGO’s (Grupo No Gubernamental), contrario na pasado ora cu ta djis gobierno ta haya esaki. Por lo menos, segun minister Oduber. E mandatario a mustra cu ta un exigencia awor di gobierno pa desaroyadornan presenta esaki y nan duna esaki na NGO’s delanta. Di otro banda, a critica cu e NGO’s tin critica pero ora cu invita nan pa reunion, hopi no ta presenta. Pues segun Oduber, e NGO’s mester ta serio den nan asunto. NoticiaCla a compronde mientrastanto, cu algun NGO’s a informa caba cu nan ta contra e proyecto.