Airbnb, Gobierno y Aruba Tourism Authority a renoba acuerdo

Posted on 02/10/2019 8:31 pm AST | Updated on 02/10/2019 8:32 pm AST

ORANJESTAD - E siman aki, e plataforma digital pa acomodacion y hospitalidad di mas grandi na mundo Airbnb a firma un acuerdo cu Aruba Tourism Authority y Gobierno di Aruba pa sigui cu e impulso pa un turismo sostenibel na Aruba a traves di ‘home sharing’.

Nan bishita a inicia cu un reunion na Oficina di Turismo, unda e ultimo desaroyo, realizacionnan y prestacionnan pa cu Aruba y e region di Caribe a wordo presenta. Despues a sigui cu un reunion na Oficina di AHATA. Parti merdia e plataforma Airbnb a firma e Memorandum of Understanding –MoU- na Oficina di Gobierno cu presencia di Minister di Turismo, Salud Publico y Deporte Sr. Danguillaume Oduber, Minister di Finansas, Asunto Economico y Cultura Sra. Xiomara Ruiz-Maduro, CEO di Aruba Tourism Authority Sra. Ronella Tjin Asjoe-Croes, y Airbnb Campaign Manager, Public Policy & Communications pa Caribe y Central America Sr. Carlos Munoz.

“Aruba a experencia un crecemento sostenibel di e sector specifico durante e ultimo añanan y nos ta sinti cu, cu e plataforma di Airbnb nos por yega na un segmento diferente di turistanan cu ta interesa di biba manera e localnan mientras cu nan ta experimenta un banda diferente di nos isla” asina Sra. Ronella Tijn-Asjoe Croes, CEO di Aruba Tourism Authority a laga sa.

A traves di Airbnb, turismo pa Aruba ta mas accesibel y ta duna un oportunidad amplio na esnan cu ta busca diversidad den estadia durante nan vacacion. Segun estadistica di Airbnb, durante 2018 e anfitrionnan di Airbnb na Aruba a yama bonbini na un alrededor di 47,200 bishitante cu un estadia di aproximadamente seis dia. E turistanan aki a wordo aloha door di 940 anfitrionnan cu a habri nan porta pa ofrece un experencia diferente di nos isla.

 

Ta bon pa menciona cu e miembronan di Airbnb na Aruba (esnan cu ta ofrece alohamento na e bishitantenan) ta un grupo hopi diverso: E edad promedio di un ‘host’ tin 48 aña, y 77% di e anfitrionnan tin un edad di entre 30 pa 59 aña. Ademas, un host ta ricibi un entrada anual average di USD $ 9.200,- 

E total di e ‘listings’ di Aruba riba e plataforma aki ta 2,300 propiedad.

 

Na e mes momento, e Arubianonan tambe ta eligi Airbnb na momento cu nan biaha pa exterior. Na 2018, 5,100 biahero procedente di Aruba a scoge pa sinti nan mes manera local di e pais ora di biaha.

  • Edificio nobo di utilidad na aeropuerto a yega su punto mas halto

    Edificio nobo di utilidad na aeropuerto a yega su punto mas halto

    ORANJESTAD – E edificio nobo di utilidad na aeropuerto a yega su punto mas halto y a celebra esaki cu e acostumbrado spantenbier diabierna ultimo. E minister encarga cu aeropuerto Dangui Oduber tabata presente pa e evento, y hunto cu e director saliente di aeropuerto James Fazio, a atende esaki cu invitadonan. E edificio ta parti di e proyecto miyonario di expansion di e aeropuerto, esta Gateway 2030. E ta un inversion di 500 miyon florin cu mester keda completa dentro di 5 aña. 

  • Aruba Airlines a inaugura su buelo pa Riohacha diabierna

    Aruba Airlines a inaugura su buelo pa Riohacha diabierna

    ORANJESTAD – Despues cu a haci estudionan necesario, Aruba Airlines a ‘inaugura’ su buelo pa Riohacha Colombia diabierna mainta, cu un grupo di prensa y algun pasahero. Segun operations manager Frank Arends, esaki ta bira un di e tres destinacionan cu Aruba Airlines kier bula pa Colombia. Fuera di Riohacha, tin pensa tambe pa bula Medellin y Baranquilla. A cuminsa cu Riohacha pasobra e ekipo (avion) ta cla y por a cuminsa mesora. E ta un ruta popular, conoci pa otro aeroliñanan manera Tiara Air cu a bula e ruta aki exitosamente pa 5 aña largo. E ta un destinacion cu ta conecta famia cu otro, comercialmente tambe y ta uno basta barata. Ta usando e avion tipo CRJ 200, cu 50 pasahero, y tin pensa di usa e mesun tipo di avion aki pa e otro destinacionan den Colombia. 

  • SADA: Gobierno a confirma cu tin placa aloca pa douaneronan

    SADA: Gobierno a confirma cu tin placa aloca pa douaneronan

    ORANJESTAD – Gobierno a confirma na sindicato di douanero (SADA) diabierna mainta, cu tin fondo aloca pa paga e asunto di structura di salario. Asina presidente di e sindicato, Eduard Maduro, a bisa Noticiacla.com diabierna atardi. Diabierna mainta e sindicato a reuni cu e trahadonan durante ora di trabou, como un tipo di accion. Esaki a haya atencion di e minister cu a reuni cu nan mesora y awor parce cu nan a sali for di e reunion den un forma positivo. 

  • KVK: Reunion cu Minister di Finanza riba reforma fiscal tabata fructifero

    KVK: Reunion cu Minister di Finanza riba reforma fiscal tabata fructifero

    ORANJESTAD – E reunion cu Minister di Finanza, Xiomara Maduro, diahuebs ultimo (22 di augustus 2019) riba reforma fiscal tabata fructifero. Asina e gremio comercial a bisa den un comunicado diabierna. Segun e gremio, e reunion tabata uno positivo, caminda tanto KvK como e Minister a discuti abiertamente riba e punto di impuesto, en particular e importancia pa laga BBO riba recibo y e consecuencianan cu esaki ta bin cu ne.

  • KvK a alerta minister di competencia inhusto di cierto distribuidor y comerciante

    KvK a alerta minister di competencia inhusto di cierto distribuidor y comerciante

    ORANJESTAD – Durante e reunion cu Camara di Comercio tabatin cu minister di Finanza Xiomara Maduro e siman aki, a probecha pa alerta e Minister riba e situacion di competencia inhusto di cierto distribuidor y comerciante den tienda ta confronta cu ne diariamente. Tin comerciante preocupa, cu tin negoshi ilegal, cu diariamente ta importa e productonan y ta capaz di pone prijs mas abou, pasobra nan no ta cumpli cu e rekisitonan, pa haci negoshi manera; registra e negoshi y paga impuesto. KvK ta sostene e empresarionan y hopi di nan ta kere den competencia, pasobra esaki ta hisa e calidad di e producto y servicio y di nan benta ta cumpli cu impuesto y e beneficionan social di empleado. Pero e comerciantenan ta haya cu esaki mester keda den un forma husto, caminda ta reina un ‘level playing field’. Un comerciante, cu ta cumpli cu ley, no por competi contra e negoshinan ilegal, cu no ta cumpli cu leynan di impuesto. Esaki ta resulta cu e gastonan pa mantene un negoshi ta mucho halto, anto KvK tin diferente opcion con pa combati esaki.

  • Presupuesto 2020 no ta keda cla pa entrega dia 1 di september awor

    Presupuesto 2020 no ta keda cla pa entrega dia 1 di september awor

    ORANJESTAD – Presupuesto 2020 lo no keda cla pa entrega dia 1 di september 2019 manera ley di comptabilidad ta prescribi. Prome Minister, Evelyn Wever, a confirma esaki diahuebs pa noticiacla.com. Di otro banda, Wever a bisa si, cu lo entrega algo pa e fecha ey, un idea di con e presupuesto lo ta. “Nos ta na e ultimo fase di prepara e begroting 2020. Nos no a cera e begroting ainda” Wever a bisa. Loke e kiermen cu esey, ta, pues yega na e surplus di 25 miyon cu tin cu yega otro aña conforme e normanan stipula cu CAFT. “Mi no ta kere nos ta cla 1 di september, pero dia 1 di september nos lo tin algo si pa entrega y mustra ki direccion nos ta bayendo”. 

  • Powered by SETAR