RdA: Sancionan contra PDVSA a afecta Citgo Aruba

ORANJESTAD – Durante un conferencia di prensa di e compania cu ta lease e refineria na CITGO Aruba, esta Refineria di Aruba (RdA), a splica cu Aruba ta afecta pa e sancionan ultimo impone pa Merca contra PDVSA, pero tin confiansa cu por sali afo pronto. Ta cuestion di convence e instancia OFAC (Office For Foreign Asset Control) cu e placa cu e compania madre ta manda pa Aruba pa continua cu e fase dos di e proyecto di rehabilitacion, no ta bay pa PDVSA na Venezuela sino pa Aruba. Algo cu gobierno di Aruba, segun presidente di RdA, Alvin Koolman a sigura prensa, ta trahando duro ariba. 

GUAIDO vs MADURO

Loke a resalta tambe ta cu CITGO Aruba ta beneficia mas si Juan Guaidó tuma control como presidente, cu si e actual presidente Nicolas Maduro haci esaki. Ta conoci cu e sanccion ta contra Maduro mientras cu Merca ta yudando Guaidó. Koolman a confirma cu Aruba ta bezig ta deal cu e team negoshado di transicion di Guaidó, pa keda cla y asina yuda Aruba keda cla si nan tuma mando. NoticiaCla a puntra Koolman, ki peliger tin si dado caso Guaidó no logra bira presidente mes y cu Maduro mes keda cu e poder. Segun Koolman, aworaki Guaidó ta esun cu ta miho pasobra e ora no tin sanction mas, mientras cu e sancionan awor ta contra Maduro. Pues, de facto, Koolman ta mustra cu ta beneficia e refineria mas si Guaidó ta na mando.

CONTRATISTANAN 

Koolman a confirma cu enberdad tin varios contratista cu tin lunas cu no a ricibi pago, pasobra Merca no ta mandando e placa aki. Mes momento tin 4 compania contratista cu entrante awe diabierna, ta stop di traha y ta bay cas. Ta trata di un grupo di 46 trahado cu no ta necesario mas (pa awor) pa traha y ta slow down esaki. Ta purbando pa mas lihe posibel nan por haya trabou bek. A sigura cu e trahadonan otro local si ta keda traha pa loke ta e operacion. A mustra cu tin 300 trahado di cual 150 ta den servicio directo di Citgo Aruba mientras cu e otro mitar ta contratista. 

STRUCTURA

E structura di Citgo Aruba tambe tabata uno cu mester a cambia dado momento, y cu a pone cu aworaki nos ta afecta pa e sancionan. Si anteriormente esaki no tabata e caso (p.e. e sancionan na 2017), awor si (e sancionan di siman pasa) esaki ta afecta Aruba. Esaki pasobra tanten cu OFAC (esun cu tin cu autorisa pago di CITGO Petroleum na Aruba) no duna permiso pa manda placa, esaki lo no sosode y e proyecto ta tranca. Ta cuestion, segun Koolman, pa convence OFAC cu enberdad e placa cu tin cu bin Aruba, no ta bay pa PDVSA, pasobra esey ta algo cu ta prohibi segun e sanccion Mericano.