Minister ta desmenti di a manda carta pa descualifica cantante di caiso

ORANJESTAD - Minister Chris Romero a desmenti categoricamente diabierna atardi tur rumor cu ta circulando tocante un supuesto carta cu e lo a manda Stichting MUSICA pa descualifica un of otro artista, for di e festival di Caiso & Soca Monarch 2019. Ta trata di entre otro e cantante Zyon King (cu presidente di hurado John Hassel a confirma ora cu a confront’e cu e number, cu no a logra clasifica pa e final di e Caiso y Soca Monarch 2019 y un otro cantante (pesey no tin su number poni aworaki:red). 

HURADO Y STRAFPUNTEN

Tabata John Hassel cu un rato prome na 24ora a confirma cu huradonan a laga e.o. Zyon afo, via strafpunten pasobra contenido di su cantica a sobrepasa regla di ofensa. E intencion tabata pa descualifik’e pero Hassel a splica cu esaki no ta posibel. A bay over e ora na sak’e pa via di votonan di castigo. Mes momento Hassel a desmenti tambe cu e lo a ricibi un carta di minister (Romero) cu e exigencia pa descualifica e cantante. 

KICO A PASATabata durante e prome anochi, cu e cantante cu ta bay bou di e number Zyon King, a canta contra algun periodista y specificamente e minister en cuestion, esta Chris Romero. Dado momento a usa te hasta e palabra ‘dom’. Ora cu e resultado di e finalistanan a bira conoci diahuebs anochi/diabierna marduga, y a nota cu e.o. Zyon King a keda afo, hunto cu un otro persona, a cuminsa cuestiona esaki. Esey pasobra su calypso tabata bon interpreta, pero e letranan tabata basta ‘pisa’. Tin e discussion awor kico e liña ta cu no por pasa ora cu den calypso/caiso ta ‘canta hende’. Ta normal cu cantantenan ta ‘canta’ hende, pero basta no bira ofensivo. Huradonan den e caso aki segun Hassel, a considera e letranan demasiado pisa,. REACCION MINISTERE mandatario en cuestion, (cu tabata den Carnival Village e anochi ey) diabierna a sigui reacciona, fuera di desmenti cu el a manda un carta na hurado. “ Como un carnavalista activo y cu semper a apoya fervientemente festivalnan di Caiso & Soca Monarch, Minister Chris Romero ta haya lamentabel cu e expresion cultural di mas grandi di Aruba, ta hayando un lus negativo door di ponencianan infunda di personanan cu menos bon intencion”. Ademas e declaracion ta bisac cu carnaval mester mantene su identidad como nos simbolo di alegria y celebracion unico cu nos ta celebra den armonia y union. “Politica nunca a mete y no lo permiti pa esaki ta e caso tampoco. Gabinete Wever-Croes ta mantene su mes bou di e reglanan di integridad y como tal hamas lo por ta involucra den e maneho di cualkier stichting of fundacion, specialmente di carnival. Ban sigui celebra Carnaval 65 den grandi, lagando tur controversia atras. Ban engrandece nos carnaval cu nos alegria y positivismo cu semper a caracterisa nos como Arubiano”, e mensahe a finalisa bisando.