Knops: Dificil midi consecuencia di sanccion Mericano pa cu Caribe Hulandes

DEN HAAG – E consecuencianan exacto pa Caribe Hulandes referente e sancionan recien emiti pa Merca contra Petroleos de Venezuela (PDVSA) , ta dificil pa midi. Asina secretario di estado Hulandes Raymond Knops a bisa Tweede Kamer den un carta diabierna. “Mi no kier specula tampoco” e mandatario a bisa. Loke si Knops a confirma den termino general, ta cu PDVSA y e companianan alia na dje, por haya nan mes den situacion mas fastioso ainda debi na e sanccionan impone.  

GASOLINE

Pa loke ta suministracion di gasoline, Knops a sigura Tweede Kamer cu no tin ningun problema directo. “Tur isla ta dispone di cargamento di emergencia pa carga un eventual interupcion di suministro (di gasoline)” Knops a bisa. Ademas tin e hecho cu tur e islanan tin aceso na e Mercado internacional pa un cantidad di proveedor di gasoline. “Gabinete (Rutte) ta mantene e demas desaroyo hopi den bista y nos ta den contacto continuo cu autoridad local di Aruba, Corsou y Bonaire”. 

E SANCIONAN

Tabata siman pasa (28 di januari 2019) cu Merca a impone sancionan nobo contra PDVSA y su aliadonan. Den cuadro di e informacionan aki, e commission fiho di Relacionan di Reino a pidimi via carta di 31 di januari 2019 pa un reaccion riba e sancionan aki pa Caribe Hulandes. 

IMPACTO

E sanccionan ta dirigi primordialmente riba transaccionan financiero unda cu PDVSA ta involucre. Tin excepcionan haci cu mester suavisa e efectonan pa comercio Mericano y otro paisnan. 

ARUBA

Mes momento na Aruba, durante un conferencia di prensa di Refineria di Aruba, e director Alvin Koolman a bisa cu ta tratando di convence Merca cu Aruba ta ok pa ricibi financiamento pa continua cu e Proyecto di rehabilitacion di e refineria pa convirtie den un upgrader. A mustra cu den un eventual cambio di mando, e lo beneficia Aruba. Aworaki tur cos ta den man di OFAC (Office for Asset Control) cu tin cu dicidi si Aruba por garantisa cu si e haya fondo pa e refineria, cu e lo no wordo manda pa PDVSA. Lesa e carta AKI.