Monumentenbureau: Reconstrui Rio Grande no ta hacie un monumento bek

ORANJESTAD – Reconstrui e edificio di Rio Grande, no lo trece bek. Y pio ainda ; un reconstruccion lo no por wordo considera monument mas. Asina hefe di Monumentenbureau, Yvonne Webb-Kock a reacciona dialuna riba e hecho cu a demoli e edificio, siendo cu tabatin otro palabracionnan haci entre e instancia aki y e doño. “ Nos ta lamenta e sucedido aki” Webb a bisa. “ Grandi tabata nos asombro diasabra cu e doño di Rio Grande Store a actua otro cu loke el a papia y garantisa nos. Monumentenbureau ta lamenta cu no a informa nos corecto”.

For di Webb, por a tuma nota cu den un tempo relativamente cortico, (for di tempo cu nan a tende di e plan te cu e edificio a keda demoli) tur cos a tuma lugar, y cu loke a sosode diasabra, lo a gara e instancia totalmente di sorpresa y cu nan lo ta pagando un prijs pa a actua di buena fe.

“ Un cuater siman pasa nos a haya un yamada di un ciudadano cu Rio Grande ta den peliger cu posibilidad di bay perdi. Nos a notifica nos Minister di Cultura sr. Otmar Oduber di biaha cu a instrui nos pa prepara e proceso di proteccion” Webb a bisa. E edificio aki lo a bira e prome monumento di un doño particulier pa bay haya proteccion. “ E proceso tabata falta poco pa termina” Webb ta bisa, sin bisa si cuanto tempo esaki ta. Pero e realidad ta, manera cu por compronde di Webb, cu e proceso no a termina y cu e edificio a keda demoli, sin cu e la logra bira monumento oficial registra.

E proceso cu tin ta cu Monumentenbureau semper ora tende cu tin un proyecto cu ta encera un monumento cu en berdad trabou ta bay wordo efectua ariba, ta acerca e doño riba kico su plannan ta. “ Cu Rio Grande nos a haci esaki y nos a yama e doño nobo di edificio historico. Nos a informe cu e edificio ta riba e lista di monumento y candidato pa proteccion” Webb a bisa. Segun Webb, e doño a informe cu semper e ta tene consideracion cu e monumento. “E la asegura mi cu el lo traha algo masha bunita pero cu kier sloop tur edificio rond di e monumento”. Monumentenbureau lo no tabatin ningun problema cu esey, basta cu e edificio monumental wordo incorpora den e proyecto. “El a garantisa mi cu e monument lo ta incorpora. Nos a ofrece nos ayudo gratuitamente y hasta potretnan bieu cu nos tabatin nos a manda pe pa e por duna su arquitecto” Webb a sigui bisa. Ehempelnan cu arquitectura nobo por bin banda di un monumento tin varios manera na Stadhuis, Ecury-complex y Corte di Husticia.

E ley di monumento ta existi y a proteha 34 monumento cu ta inscribe caba den e Registro di Monumento. Tin banda di 300-monumento cu mester wordo proteha. Gobierno ta trahando caba riba un concepto di ley pa hisa su multanan en general.