CONFIRMA: Hotel di 900 camber ta bin na Seroe Colorado

SEROE COLORADO – Si tur cos ta bon, aki 6 luna construccion lo cuminsa di un proyecto hotelero di 900 camber (600 all inclusive y 300 Transient) na Seroe Colorado na altura di Baby Beach. Fuentenan cerca di e proyecto cu a papia cu NoticiaCla a base di anonimidad a confirma e informacion, y a splica cu te hasta e financiamento completo pa e proyecto ta cla caba. Algo cu no ta sosode mucho y cu wordo considera como algo positivo y un novum. E proceso ta hopi avansa y dentro di poco, por tende mas di e proyecto aki. For di parti di gobierno, nan no kier a bisa mucho cos pero no a desmenti e informacion tampoco. Loke cu por a compronde ta cu gobierno ta trahando riba esaki pa casi un aña caba. NoticiaCla a pone man riba e EIA (Environmental Impact Assesment Study), cu ta duna basta detayes di e parti di medio ambiente, cu tambe ta cla caba. 

BABY BEACH RESORT 

E proyecto, cu lo opera  bou di e nomber di Baby Beach Resorts, lo conta cu dos fase, di cual e prome ta costa 60 miyon dollar cu ta inclui 600 camber all inclusive, restaurant y casino. E lo ta ubica riba un tereno di 105.000 m2, y e tereno aki ta cla caba, pues no ta cuestion di a duna e compania (Three Rivers Real Estate NV/Centerpoint Real Estate) un optie manera sa sosode den pasado. Den e caso aki e parti ey ta cla caba, mientras cu otro documentonan mester keda firma ainda. A compronde pues cu dentro di poco lo sali bin afo cu e detayes, y presenta e proyecto publicamente. Por compronde tambe cu e localidad lo por ta esun cu tabata destina pa e proyecto anterior di Bahia, pero cu nunca no a sigui debi cu e proyecto di reapertura di refineria a continua. 

OPOSICIONMes momento e portal aki a haya confirma tambe cu tin oposicion pa e proyecto aki, di parti di algun NGO’s, cu no ta content cu e serie di proyectonan (esaki ta un di e tres nan na caminda), y gran parti di e punto ta e forma con nan ta hinca den otro.