Hospital preparando pa virus di Ebola na Aruba

ORANJESTAD – Un entrenamento den fin di siman cu hospital Dr Horacio Oduber a haci, a indica cu e hospital no ta completamente cla ainda pa por atende eventual casonan di Ebola. “Hopi informacion a sali for di e entrenamento aki” director interino di hospital, Ezzard Cillie a confia na prensa dialuna merdia. Un yamada cu un turista lo por a keda infecta y tabata na caminda pa hospital, tabata parti di e entrenamento. Aki a bin conoce cu den e parti di comunicacion, tabatin fayonan cu sigur mester mehora. Pero Cillie, hopi cauteloso a splica cu hospital ta den proceso di preparacion pa un eventual caso di e virus di ebola wordo registra na Aruba. Den caso cu mester registra un caso di Ebola, e prome yama pa actua ta keda e minister di salud Alex Schwengle, segun director interino di hospital, Ezzard Cillie. Y tur loke ta sosode, ta hunto cu dept. di salud mirando e embergadura di e virus aki. Como tal, segun Cilllie, si un caso di Ebola presenta na Aruba, lo considera esaki casi un crisis nacional.

Contrario na pensamento di otro instancianan, Cillie a mustra cu nos no por nenga cu aki na Aruba facilmente nos por wordo enfrenta cu un caso di Ebola. “Djis pensa nos puertonan cu ta habri, djis pensa tankeronan cu ta yega aki nan cu destinacion di Africa” Cillie a bisa.

Loke Cillie a mustra cu Aruba ta haciendo tur posibel, hunto cu dept di salud y e minister responsabel, pa sigura cu pa ora un paciente cu simptoma di ebola yega na hospital, cu e por wordo trata segun protocolnan necesario. Tin personal cla, y facilidad cla pa atende cu esaki. Segun Cillie, por atende te cu 2 persona cu e infeccion, y lo haci esaki den un facilidad isola, aunke no kier a bisa exactamente unda esaki lo ta. Tabata hopi cla cu e ta un esfuerso di un grupo di instancia cu ta bin hunto pa por combati e malesa aki, si e mester yega Aruba.