Wever na Parlamento: Aruba ta bon prepara pa situacion na Venezuela

Posted on 02/6/2019 6:45 pm AST | Updated on 02/6/2019 6:50 pm AST

ORANJESTAD – Aruba ta bon prepara relaciona cu e situacion di Venezuela. Asina Prome Minister Evelyn Wever a sigura miembronan di Parlamento durante un ‘bijeenkomst publico’ riba e tema di Venezuela diaranson atardi. Rondona pa expertonan riba nan respectivo tereno, Wever a contesta mas di 50 pregunta riba e tema. Preguntanan ‘con bon ta prepara’, ‘posibel influx masal di pais bisiña’, ‘efecto pa nos turismo’, ‘garantia di suministro di gasoline’ y mas a keda contesta. A resalta cu Aruba ta prepara pa cualkier eventualidad, y si mester mas, tin garantia di Gobierno di Reino pa mas eventual asistencia, incluyendo uno militar.

SCENARIO

Wever a cuminsa na dileña varios scenario posibel, manera uno extremo di p.e. un guera civil te na esun mas trankil di un traspaso ordena di poder eventual. Den caso di un guera civil, por spera un influx masal, pa cual tin un plan ‘in place’ pa atende cu e situacion. Loke tin cu haci awor ta busca financiamento pa e plan aki, aunke tin un suma inicial di 1.9 miyon florin pa tipo di casonan asina. 

REPRESAYA

No tin ningun menasa pa un represaya di parti di e presidente Maduro aworaki, pero Aruba ta prepara pe segun Wever. Dado caso por tin un represaya contra islanan ABC (pa e actitud di Hulanda contra Venezuela), por pensa riba ceramento di frontera cu tin cu tin efecto pa e.o. importacion di fruta, aunke esaki a disminui. Loke ta preocupa Wever, ta si frontera cera y tin Arubiano eynan pega na Venezuela. Pesey a bolbe ripiti pa no bay si no tin nada di haci. “Si tin hendenan eynan, no por trece nan bek Aruba”. Otro consecuencia por ta e refineria cu ta CITGO. Pa loke ta e refineria, ta preguntanan cu a bin dilanti di varios parlamentario mustrando cu e ta un preocupacion valido. A confirma cu tin sanccionan nobo cu tin efecto riba e operacion na Aruba. Entre nan, acceso posibel na e inversion di e placa pa e siguiente fase, cu por keda afecta. Pero no por sigura esaki segun Wever. A mustra cu lo check esaki cu Washington. 

WELGA NA CITGO ARUBA

A haci mencion di e anuncio di e sindicato di e refineria IOWUA diaranson atardi (Boy Anthony)  cu a lo menasa posiblemente den un entrevista na e portal 24ora.com, di un posibel welga di e trahadonan di refineria, unda cu ta papia di para suministro di gasoline y otro productonan, debi cu e trahadonan ta malcontento cu e situacion laboral eyden. Segun Wever, un anuncio asina na e refineria riba sensasion ta wordo crea riba algo cu no ta den nos man. “Esaki ta algo hopi serio. E operacion ta wordo afecta pa e situacion na Venezuela. Pone trabou abou, bay den un wild strike, bo stroba gasoline (di wordo suministra:red) , e ora si e problema di refineria ta bay den un forma acelera” Wever a bisa riba e tema. A pidi pa keda trankil y no bay core haci cos pa sensacion.

SCENARIO MILITAR 

Wever a sigura cu no tin ningun plan di plan militar pa cu Aruba. Manera cu a wordo splica, defensa Hulandes ta esun encarga cu proteccion di nos pais. Nan tin un plan y por wordo ehecuta ora cu mester. No tin barco di guera (ainda) dilanti costa di Aruba y Corsou pasobra no ta necesario ainda. Segun Wever, no kier spanta turistanan pa cu esaki ainda. Y Wever a sigura cu gobierno tin confiansa cu marina por actua mesora ora cu ta necesario, y a usa e situacion di horcan na St Maarten ora cu Hulanda a ‘rol uit’ un plan military di asistencia mesora. 

PLAN DI CONTINGENCIA EXODUS MASAL 

Un pregunta cu a keda ripiti pa varios parlamentario, ta esun di e plan di contingencia en caso di un exodus masal for di Venezuela pa p.e. Aruba. Wever a splica cu segun tratado, unabez ricibi hendenan aki,  mester duna  nan cas, cuminda y mas cos basico. Tin e plan pero a mande pa Hulanda pa wak si ta paga pe. Tin un prijs caartchi mara na dje pa cual ta buscando fondo. Asina cu esey ta canalisa, por duna mas informacion. No ta posibel pa duna informacion detaya.   Esaki no ta un tema di Aruba so y Wever a sigura cu lo haya Reino pa carga su responsabilidad den e caso aki.  

COMUNICACION

Pa loke ta comunicacion, Wever a sigura cu tin un strategia di comunicacion unda cu tin un team cu ta informa gobierno na nivel local pa loke ta e posicion di Aruba den e totalidad. E tipo di noticia  mester afecta Aruba directamente. Ademas tin un ‘media strategy’, cu ta e conferencianan di prensa semanal y ta duna diferente fraccion parlamentario briefing riba esey tambe. Ademas ta keda pendiente pa conferencia extra ordinario. Segun Wever, si tin rumor, y no tende nada di gobierno, e ta fake news. “No comparti fake news” e mandatario a suplica un y tur. 

CON PREPARA NOS TA

Varios parlamentario a puntra riba e grado di preparacion di Aruba pa e situacion di Venezuela. “ Nos ta bon prepara, lo mehor prepara” Wever a sigura un y tur na varios occasion diaranson. Tin un asina yama ‘dossier Venezuela’, cu ta un dossier cu a atende e situacion semper di punto di bista di influx masal di persona.  E mandatario, basa riba pregunta, a sigura cu Bureau rampenbestrijding ta atende cu e coordinacion di e plan y cu nan ta hopi bon prepara. Pa ilustra esaki Wever a menciona p.e. cu nan a reuni no menos cu 228 ora aña pasa pues tabatin basta reunion. A bolbe ripiti cu tin un plan riba papel, y tin fondo, y pa cualkier eventualidad por cuminsa usa e fondo di 1.9 miyon. Tin compromiso di defensa Hulandes , y un coordinacion constante cu islanan ABC, esta Corsou y tambe Bonaire aunke nan ta forma parti di islanan BES. 

RESERVA LOCAL

Un preocupacion tabata e suministro di e.o. gasoline y kerozine. Segun Wever, esaki no ta un riesgo. E gasoline no ta bin di Venezuela, sino Colombia, Santo Domingo y Merca. Tambe a puntra si tin suficiente material pa yuda si mester. Si ta material relaciona cu militar, e ta den man di defensa. Pero otro material, nos tin suficiente segun Wever. 

TURISMO

Un pregunta hopi haci, ta e peliger pa cu turismo. Aki Wever a mustra cu esaki ta su preocupacion di mas grandi. Pesey el a pidi repetidamente pa no bay den panico y pa keda trankil. “Si Aruba mes confirma panico, e ta afecta turismo” Wever a splica. E ta sigura cu ATA ta un parti importante di e team pa loke ta e comunicacion pa loke ta turismo. Nan ta sigui esaki hopi di serca local y internacional. “ E ta den bon man eynan” Wever a purba di sigura tur parlamentario. 

ACCION HUMANITARIO

Pa loke ta accion humanitario, Minister Hulandes Stef Blok a informa cu relacionan exterior ta bay check kico tin cu haci riba esey. Wever a sigura cu contrario na informacion suministra den fin di siman, cu Aruba no a haya ningun confirmacion y no ta Aruba ta bay usa su material pa bay Venezuela. “Di otro caminda e tin cu bin y no di Aruba” Wever a bisa, indicando cu no por ta asina cu Aruba tin cu manda su material pa otro caminda, mientras cu nos mes mester. “  E accion aki ta no ta inclui cu Aruba ta ‘vang op’ hende” Wever a sigui bisa.  Pa loke ta e situacion di hende blacklisted  cu lo por drenta Aruba, Wever a sigura cu apesar di e situacion na Venezuela, nos reglanan ta sigui conta. Un persona cu no por drenta, ta wordo señala segun e puntonan regular manera semper. Repercushon a termino cortico no tin pero ta tene cuenta cu ne si. 

 

  • Lider di MEP Evelyn Wever: Luigi Bergen lo bira parlamentario pa MEP

    Lider di MEP Evelyn Wever: Luigi Bergen lo bira parlamentario pa MEP

    ORANJESTAD – E candidato Luigi Bergen lo bira e reemplasante di parlamentario Sue-Ann Ras pa fraccion di MEP den Parlamento. Asina Evelyn Croes a contesta Noticiacla.com diahuebs mainta riba e pregunta si a keda cla caba finalmente ken ta reemplasa parlamentario Sue-Ann Ras. Despues cu parlamentario Sue-Ann Ras a informa e siman aki definitivamente, cu e no ta bolbe como parlamentario, a cuminsa e proceso definitivo di reemplas’e. “Sr Luigi Bergen ta esun cu tur probabilidad lo asumi e funcion” Wever a bisa e portal aki . E hecho cu Ras a acepta pa keda te dia 10 di september, ta duna e partido e espacio necesario pa regla esaki mas liher. 

  • Cambio di ley di LAFT ta riba agenda pa RMR otro siman

    Cambio di ley di LAFT ta riba agenda pa RMR otro siman

    ORANJESTAD – E cambio di ley di LAFT ta riba agenda di Rijksministerraad di Hulanda di otro siman 30 di augustus. Esey a keda confirma pa Prome Minister, Evelyn Wever, na NoticiaCla.com diahuebs durante conferencia di prensa. Pero no tin un decision ainda, kico pa haci cu ne na Aruba. “Nos ta den deliberacion cu Hulanda ainda. Nos no ta completamente afo, pero mi tin contacto si cu e secretario di estado (pa Asuntonan di Reino, Raymond Knops:red) y mi tin tur confiansa cu nos ta sali afo,” Wever a bisa. Un posibel accion di parti di Hulanda pa e fecha ey, e mandatario di Aruba no por a confirma. Esta, si Hulanda ta cla pa tuma un paso caba contra Aruba. 

  • Wever: Richard Arends tin te diabierna pa produci prueba di carta di retiro na RdA

    Wever: Richard Arends tin te diabierna pa produci prueba di carta di retiro na RdA

    ORANJESTAD – “Si pa diabierna awor Parlamentario Richard Arends no presenta su carta di retiro pa su funcion di director financiero na Refineria di Aruba (conforme un contracto cu lo tin), gobierno di Aruba como accionista di e compania, lo instrui e compania pa cuminsa e proceso di retiro ‘oficial’ contra e awor parlamentario di partido AVP”. Asina Minister Presidente Evelyn Wever Croes a bisa Noticiacla.com durante e conferencia di prensa di gobierno. Segun Wever, e contracto aki, por hinca pais di Aruba den problema financiero serio, si e contracto resulta valido ainda. Ta trata di un contracto cu Arends a cera na 2016, pa e funcion di director financiero, pero cu manera e mes a bisa, nunca no a materialisa, pasobra el a opta pa tuma e oferta di bira Minister di Economia despues. 

  • Wever: RdA no a haya carta di retiro di Richard Arends pa su funcion

    Wever: RdA no a haya carta di retiro di Richard Arends pa su funcion

    ORANJESTAD – “Refineria di Aruba (RdA) nunca no a haya carta di retiro di parlamentario Richard Arends, pa su funcion di director financiero”, asina Minister Presidente, Evelyn Wever Croes, a bisa NoticiaCla.com diamars merdia. Parlamentario Richard Arends (AVP) mester proba, cu enberdad el a retira RdA, pa e limpia su nomber segun e prome mandatario. Sinembargo Arends ta sigura NoticiaCla.com cu el a entrega RdA e carta, pero no a produci e carta pa e portal aki ainda. 

  • Sasakiweg a cambia oficialmente pa Avenida Nelson Orlando Oduber

    Sasakiweg a cambia oficialmente pa Avenida Nelson Orlando Oduber

    ORANJESTAD - Dialuna anochi gobierno di Aruba a oficialmente cambia Sasakiweg den Avenida Neson Orlando Oduber. Esaki debi cu Oduber den añanan 80 a percura pa crea e avenida cu ayudo di e grupo di Boston, Sasaki Group cu a diseña henter e infrastructura aki. Potret cortesia Nelson Oduber Jr. 

  • Prome Minister Wever ta kere cu parlamentario Arends mester retira

    Prome Minister Wever ta kere cu parlamentario Arends mester retira

    ORANJESTAD – Un documento cu a aparece aworaki ilustrando e hecho cu un actual parlamentario lo a haya un funcion halto na Refineria di Aruba (RDA), a crea comocion dialuna den mundo politico na Aruba, te na e punto cu prome minister ta ‘sugeri’ retiro di un parlamentario di AVP. “Ta resulta awor cu a nombra Richard Arends como director financiero di RdA na aña 2016. Te awe e ta nombra. Y pa kit’e di trabou mester pag’e 2.6 miyon florin!” Prome Minister Evelyn Wever a post riba su pagina di Facebook. “Integridad! Mi ta mas determina cu nunca, pa bin cu e institutonan”. Arends mientrastanto a admiti na NoticiaCla.com cu enberdad RDA a ofrec’e e funcion, pero nunca el a tum’e, ya cu a pidie y el a scoge e ora pa bira Minister di Economia pa gabinete Mike Eman II. 

  • BTA
  • Crystal Jeep
  • Powered by SETAR