Tur cos ta cla pa e di tres anochi di prefinal Caiso/Soca Monarch 2019

SAN NICOLAS – Diaranson anochi ta e di tres anochi di e prefinals di Caiso & Soca Monarch Festival 2019 den Carnival & Entertainment Village, cu un total di 7 banda y 33 cancion. E diferencia di awenochi ta cu tur hende por bin cu nan stul di tela, pa asina nan haci nan mes mas comodo. Pa loke ta e artistanan, compara cu e anochi prome cu no tabatin hopi ‘conoci’ y un anochi basta bashi, diaranson ta diferente cu nombernan grandi manera Claudius Philips Jr, Valentino King, Dr Hook y The Baron. Fuera di esey, lo tin e legendarionan di tur tempo, Musical Time cu nan elenco Lorch Cachete, Lady K, Long Roy y King Chicho. Tur ta presenta awe nochi cu ta haci e anochi uno hopi interesante. 

STUL

Pa loke ta e asunto di stul, manera NoticiaCla a raporta anteriormente, tabata durante un conferencia di prensa diaranson merdia cu presidente di MUSICA (responsabel pa organisacion di e festival:red), Edwina Werleman a haci e anuncio cu despues di deliberacion, a dicidi cu ta permiti stulnan di tela drenta. Ademas a anuncia tambe cu pa diasabra awor por cumpra carchi separa, compara cu e posibilidad di solamente cumpra pakete pa henter siman. Entrante diahuebs ta cuminsa bende carchi ‘singular’ na balor di 50 florin, y 60 florin na porta diasabra. E carchinan singular ta optenibel na tur CITGO gas stations. Check e lista di participante AKI.