Premier Eman: Polis tabata liber pa tuma cualkier desicion pa evento 11-11

ORANJESTAD – E permiso cu polis a duna pa organisa e apertura di carnaval 2015, no mester di aprobacion di minister. Esaki premier Mike Eman a bisa NOticiaCla.com dialuna mainta como clarificacion riba e polemica cu a surgi den fin di siman. Ora cu a bira conoci diabierna siman pasa cu SAC lo a haya e permiso, minister encarga cu cultura, Otmar Oduber a rabia publicamente y mustra su desaprobacion. Di banda di Alto Mando, NoticiaCla.com a compronde cu no ta haci nada sin cu nan haya autorisacion di gobierno. “ E unico peticion cu a sali for di ministerio di asuntonan general pa cuerpo policial, ta peticion pa no duna permiso ainda pa carnaval 2015” Eman a sigura NoticiaCla.com. “Polis tabata liber pa dicidi cualkier decision riba evento di 11 di november” Eman a sigura pasobra gobierno no a prohibi polis pa esey.

E hecho cu su colega minister Oduber tabata disgusta y a haci declaracionnan basta fuerte den direccion di polis den fin di siman, Eman no por a reacciona ariba. “ Mi ta kere cu minister ta un minister cu un pasion grandi pa carnaval. Mi ta kere cu un di e lidernan grandi di carnaval cu ta dedica su mes cu alma y cuerpo pa carnaval” Eman a bisa di e reaccion. Mas e no por a bisa pasobra e no a scucha e declaracionnan haci. Pero e por compronde e actuacion di Oduber riba e topico aki.

Tabata den fin di siman cu e mandatario encarga cu cultura, a rabia riba e desicion di polis pa duna SAC un permiso. "Cuerpo policial mester carga su responsabilidad cu a caba cu carnava"l. Esaki tabata pensamento di minister Otmar Oduber diasabra mainta na NoticiaCla.com. Segun e mandatario, e no ta nada contento. “Absolutamente cu no. Y no ami so. Henter gobierno” Oduber a bisa, indicando cu “aparentemente no tin respet ni pa gobierno” Oduber a sigui bisa. “Hopi cla, gobierno a duna di conoce na cuerpo policial, cu mester wanta cualkier dunamento di permiso te ora cu caba di haya e consehonan necesario. Pa loke ta su proximo paso, e no kier a duna mas comentario e momentonan aki. Loke si NoticiaCla.com a compronde diasabra tabe di e mandatario cu e  ta pone un punto tras di e asunto aki. Foto cortesia KPA.