Ruiz: Na altura di e situacion di douane y ta trahando riba dje

ORANJESTAD – E situacion di douaneronan na aeropuerto ta conoci pa e minister encarga Xiomara Ruiz Maduro. Asina e mandatario a sigura NoticiaCla diamars mainta. A tuma nota di e informacion cu a surgi di e conferencia di prensa y a mustra kico ta loke el a haci riba e situacion. El a mustra su desaprobacion pa e forma con e sindicato kier traha, refiriendo na e ultimatum cu a pone di apenas un weekend di tempo. “SADA a manda un carta diabierna 7or di anochi cu un deadline pa dialuna. Asina no ta sistema di traha” Ruiz a bisa e portal aki.

ULTIMATUM

Segun Ruiz no obstante cu e ta considera e forma di traha di e sindicato como uno no corecto, el a opta pa reacciona mesora. “Manera mi a haye, mi a contact e director y pidie un update. Esaki ta e cosnan operational cu director y leiding di Douane ta traha riba dje y como Minister mi mester por conta cu e trabou aki ta wordo haci pa e leiding” Ruiz a bisa. 

FROSTED GLASS

E mandatario tabata na altura di e asunto di frosted glass ora cu NoticiaCla a puntra su reaccion. “ Tocante frosted glass mi sa cu e leiding di Douane ta delibera cu AAA (maneho di aeropuerto:red)  riba e punto aki y ta e intencion pa haci e cambionan y 'blinda' e glass di un otro manera. Esey ta e otro manera di blinda e glass. Segun Ruiz, enves di usa frosted por usa bankersline cu ta duna mas visibilidad pero toch cierto privacidad. No ta conoci kico lo sosode awor cu e sindicato manda e mandatario un peticion pa audiencia.