Douaneronan preocupa cu situacion di nan seguridad na aeropuerto

ORANJESTAD – Douaneronan a mustra nan malcontento diamars mainta durante un conferencia di prensa, pa loke ta e seguridad na aeropuerto. PResidente di sindicato SADA Eduard Maduro a referi na e incidente na comienso di aña unda cu douane a intercepta un arma di un pasahero, cu bala cayente ‘cla pa tira’. Despues cu no a haya reaccion necesario, a opta pa protesta e siman aki. Pero mirando e situacion delicado di Venezuela, a opta pa coopera y bati alarma pa medio di un conferencia di prensa. A finalisa bisando cu lo pidi un audiencia cu e mandatario Xiomara Ruiz Maduro pa trata e tema. 

E CASO

Maduro a cuminsa na relata e suceso cu a pasa na comienso di aña (9 di januari 2019) ora cu un douanero a intercepta e arma di candela cerca un pasahero procedente di Colombia (segun Maduro). Segun e presidente di SADA, ta un indicacion cla cu cosnan ta pasa y yega y drenta manera nada, debi na e decision di leiding (mando di douane:red) pa acepta un ‘minimale bezetting’ na aeropuerto. Maduro a purba splica cu esaki no ta funcionando, y ta mucho trabou pa un grupo di apenas 2 douanero haci. “E ta un decision descabeya, un mal decision” Maduro a bisa. Director di douane lo a conseha minister encarga Xiomara Ruiz Maduro cu e minimale bezetting ta funciona. Segun Maduro, ta bon cu dia di e incidente, tabatin mas personal pa haci e trabou, sino por a spera lo peor. No kier imagina si a usa e arma e dia ey. 

FROSTED GLASS

Loke cu Maduro a pidi, ta pa kita e asina yama ‘frosted glass’, esta e glass cu ta tapa bista (pa proteccion:red) di e douaneronan riba e pasaheronan. Segun Maduro, e tipo di glas ey ta stroba douaneronan di por haci nan trabou di profila e pasaheronan delanta. A pidi intermediacion di e director pa bin cu un otro tipo di glas unda cu douane si, por lo menos por wak door di dje y profila e pasaheronan. Pero segun e director, e lo a tuma un ‘houding’ di ‘ no por haci nada y ta cu aeropuerto mester actua’. 

DEADLINE

Maduro a referi na un ultimatum di dia 31 di januari 2019, cu a vence mientrastanto. Como tal kier a protesta durante ora di trabou, pero debi na e situacion delicado di Venezuela, a opta pa tene un conferencia di prensa y asina informa pueblo riba preocupacionan di e sindicato. A dicidi pa pidi e minister encarga, pa un audiencia proximamente.