Postura di Reino Hulandes ta ‘yuda’ islanan ABC pa cu Venezuela

ORANJESTAD – E postura cu Reino Hulandes a tuma contra pais bisiña Venezuela ta ‘yuda’ islanan ABC pa cu Venezuela, pa straño cu ta zona. Asina informantenan diplomatico cerca di e asunto a confia na NoticiaCla dialuna. Reino Hulandes a mustra nan sosten tras di e presidente interino Juan Guaidó, pero a opta pa no kibra e relacion diplomatico y consular cu e actual presidente Nicolas Maduro. Esey ta pone cu, contrario na otro paisnan cu a kibra relacion cu Maduro, esaki no tin efecto negativo pa e.o. Aruba. 

ARUBA OK

“Aruba ta sali ok di e asunto aki, pa aworaki” e comentario di e fuentenan diplomatico tabata. Sinembargo e presidente a saca un nota dialuna di lo tuma accion contra esnan cu a tuma postura di reconoce Guaidó como presidente. E carta aki tabata uno general y no a haci mencion specifico di  paisnan. “E ta algo necesario, y no ta specifica paisnan. Pero Hulanda no ta cay den e grupo aki (ainda)”, tabata e comentario. 

REACCION

E reaccion riba e declaracion di e mandatario Hulandes a wordo cataloga como uno swak, y usando e dicho popular cu e mandatario no ta ‘ni carni ni pisca’. Esaki pasobra e no por a dicidi algo y a opta pa tuma un decision cu pa hopi, ta confundi mas ainda. Otro paisnan p.e. a tuma e postura di rechasa Maduro, kibra relacion cu e presidente y tuma posicion pro e presidente auto apunta esta Juan Guaidó. Hopi ta pensa cu esaki no ta corecto. Of bo ta apoya uno of e otro, pero no por ta haci’e tur dos. Pero ta netamente e accion aki, ta loke ta trece trankilidad, pa awor, entre Venezuela y e islanan ABC. Hopi ta bisa cu ta e relacionan commercial entre Reino Hulandes y Venezuela ta pone cu Hulanda ta actuando asina ‘cu cuidao’.