Wever: Aruba no ta parti di ningun accion militar pa cu Venezuela

ORANJESTAD – “ Aruba no ta forma parti di ningun accion militar, ni Aruba ni Reino a ricibi un peticion asina”. Asina prome minister di Aruba Evelyn Wever a declara pa NoticiaCla diadomingo atardi. Cu esaki e ta kita tur rumor cu ta coriendo rond na Aruba riba e situacion cu Venezuela. Un texto riba social media ta bisa cu Aruba lo ta parti di un di e tres puntonan strategico pa yuda Venezuela.  

MILITAR

“Na e momentonan aki no tin otro militar na Aruba. Mi ta pidi tur hende na Aruba pa keda trankil, pa nos no recuri den panico. Pa asina den trankilidad tuma e decisionnan den interes di nos pais Aruba”, Wever a sigui bisa diadomingo, relaciona cu e situacion tenso cu tin na e pais bisiña.  

MENSAHEHAN

Nos pais bisiña Venezuela ta pasando momentonan transcedental.“ Mi ta sinti tambe un preocupacion den comunidad. Y no ta sin motibo si nos mira tur e mensahenan cu ta wordo pasa rond. Pa loke ta trata Aruba, mi por segura cu e noticianan no ta corecto” Wever a sigui bisa. E prome mandatario a sigui bisa cu aki na Aruba nos ta sigi e situacion na Venezuela di serca.  Pa asina nos ta prepara pa cualquier eventualidad pa proteha nos pais.

REUNION DIARANSON

Wever a sigura tambe cu den seno di gobierno nan ta reuni cu autoridadnan local riba e topico aki tur dia. “ Ami algun biaha pa dia. Nos lo ta diaranson den Parlamento hunto cu autoridadnan local concerni, pa duna mas informacion.  Hunto cu Marina Real, autoridadnan local tanto riba lama como na tera y den coordinacion cu Curacao, Reino henter ta prepara pa atende cu e tema di Venezuela debidamente y asina cu tin informacion mas concreto, nos lo comparti esaki cu pueblo. Aparte di esey loke nos cada un por hasi ta uni den oracion pa Venezuela” Wever a sigui bisa, indicando tambe cu ‘ohala por bin un resolucion pronto’.