Ultimatum di 8 dia na Maduro impone pa UE ta keda vigente

BRUSSELS – E hecho cu Union Europeo a dicidi diahuebs cu ta reconoce e auto-declara presidente interino Juan Guaidó como e hefe di estado di Venezuela, y a forma un ‘grupo di crisis’ cu un ultimatum di 90 dia pa resolve e problemanan na e pais, no ta kita e ultimatum poni di 8 dia impone na e presidente Maduro. Esaki ta nifica cu pa dialuna, si Nicolas Maduro no convoca eleccionan presidencial nobo na e pais, paisnan Europeo, incluyendo Hulanda, lo declara nan sosten na Guaidó. Algo cu nan tabata sceptico pa haci prome cu esey. Hulanda tambe ta forma parti di e grupo di crisis. 

DIFERENCIA 

Informacion fededigno cu NoticiaCla tin via canalnan diplomatico, ta mustra pues cu e ultimatum di 8 dia ta keda vigente. Esey kier men cu pa otro siman dialuna ora cu e ultimatum aki vence (a duna Nicolas Maduro 8 dia pa convoca eleccionan presidencial nobo, sino ta sostene Guaidó publicamente como e presidente interino), e consecuencianan lo ta conoci.  

DIAHUEBS

E declaracion di Union Europeo diahuebs a crea confusion unda cu hopi, incluyendo diplomaticonan Venezolano, a interpreta e 90 dia declara diahuebs, como un ‘reemplazo’ di e  8 dia di ultimatum poni, allargando e situacion debi cu ‘lo mester tabatin mas tempo’ pa yega na un acuerdo. Esey sinembargo no ta e caso. Segun Reuters, loke cu gobiernonan formando parti di UE a dicidi, ta pa lidera un grupo di crisis internacional cu paisnan Sur Americano pa busca eleccionan nobo, y poniendo un timelimit di 90 dia, y menasando cu mas sanccion economico. Esaki ta nifica cu posiblemente dentro di 90 dia por tin eleccionan presidencial na Venzuela si ta pa UE. E raportahe di Reuters ta haci mencion si cu e no tabata facil, pasobra entre gobiernonan tabatin division riba e tema di reconoce Guaidó of no. Italia p.e. no tabata pro. Parlamentarionan Europeo a vota 439 na fabor y 104 contra, cu  88 voto di abstencion den un seccion special na Brusselas pa reconoce Guaidó como e lider interino. Den un declaracion mutuo, Parlamento Europeo a urgi e bloke di 28 gobierno pa sigui su ehempel y considera Guaidó e unico presidente legitimo, ‘te ora cu tin eleccion presidencial nobo, liber, transparente y confiabel’

 NERVIOSO

Aunke cu ta acusando Maduro di un democracias sofocante, UE ta nervioso di e precendente crea di un ‘auto declaracion’ y como tal tabata dudoso pa sigui Merca y mayoria pais Latino Americano den reconoce  Guaidó mesora. Inglatera, Francia, Alemania, Spaña y Hulanda a bisa diasabra siman pasa sinembargo, cu nan lo reconoce Guaidó solamente si Maduro no convoca eleccion presidencial dentro di 8 dia. Pero UE completo no a pone un time limit den su yamada pa un eleccion presidencial . E grupo forma, lo kier coordina reglanan pa trece e oposicion y Maduro mas cerca di otro, pa evita reprecion y acorda eleccionan nobo. Si no logra esaki dentro di 90 dia, e grupo lo stop di existi.