Prome competencia Open Water Swimming pa Dia di Betico exitoso

SAVANETA - Recientemente Aruba Swimming Federation, AZB a organisa e prome competencia di Open Water na cas di Roly Bisslik na Savaneta. Un total record di 91 landado a inscribi pa asina participa na e competencia cu tabata uno clasificatorio pa e Carifta Games cu e aña aki lo tuma lugar na Barados. Mester bisa cu e mayoria a competi den e 1km y 3km, mientras un grupo selecta a dicidi di bay e 5km. E trajectoria sigur no tabata facil cu hopi coriente y biento pero asina mes tur hende a haci nan maximo esfuerso pa logra un bon resultado y tempo. E 1km a wordo gana pa Braynsly Dirksz mientras e 3km a wordo gana pa Elisabeth Timmer y e 5km a bay pa Lucien Peterson cu a triunfa anja pasa tambe den e mesun evento aki. Pa damas, Nayla Arends a gana esun di 5km. 

E comision di Open Water Swimming tabata hopi satisfecho cu e acohida di e prome competencia oficial clasificatorio di Open Water na Aruba. E landadonan a responde bon na e evento mientras e evento mes a cana soepel y segun schedule. E promixo competencia di Open Water lo ta rond di e celebracion di nos Himno y Bandera y esaki tambe lo ta un evento clasificatorio, e biaha aki pa e Central American and Caribbean Amateur Swimming Confederation, CCCAN.

Sportsubsidie Aruba ta contento di por aporta y brinda e ayudo necesario na e federacion di landamento cu nan prome actividad oficial di Open Water Swimming local na Aruba.