Casi 40 mil plachi di number di vehiculo di motor no ta paga ainda

ORANJESTAD – Casi 40 mil number di auto na Aruba ainda no a paga nan number di vehiculo di motor. Asina vocero di departamento di impuesto (DIMP) Meverly Romano a bisa durante un conferencia di prensa diahuebs. Esey ta representa 43% di tur esnan registra. Na tur, tin 39.326  number di vehiculo di motor cu no tin nada paga ainda. DIMP ta haya e cifra aki considerable. Mientrastanto 51% si a cumpli pues cu a paga e number, cu ta 44.962 plachi. Manera NoticiaCla a informa den un articulo adhunto, basa riba e cifranan aki, a opta (cu permiso di minister di Finanza) pa prolonga e deadline di paga number, cu un luna mas esta 28 di februari 2019. 

CIFRAS

Manera ta conoci, tin 87.116 number di vehiculo di motor registra na Aruba, pues esey ta e cantidad di plachi activo cu tin registra. Di esey, tin 76.217 plachi ‘A’, 4642 plachi ‘V’, y 2258 plachi ‘MFA’ (motorfiets). For di e numbernan ey, 38% ta plachi paga pa full aña, cu ta 33.470 plachi, mientras cu 11.492 plachi ta paga pa mitar aña cu ta 12%. 

NO PAGA

Ta resta 39.326 plachi cu no tin nada paga ainda, cu ta 43%. For di esey tin 32.731  plachi cu ta ‘A’, bon pa 43% di e totalidad. Tin 3389 plachi di categoria ‘V’ cu no ta paga ainda, cu ta 73%, y di MFA (motorfiets) tin 1154 plachi no paga ainda cu ta 51%. Interesante ta cu tin un grupo cu a entrega plachi bek cu ta 2828 plachi cu DIMP a ricibi bek cu no ta wordo usa mas, di cual 2590 no tin debe riba dje, mientras cu 238 tin debe ariba.