Bermudez: Aumento di BBO entrante 1 di december awor

ORANJESTAD – Aumento di BBO, den forma di un health tax lo por keda cla pa 1 di december proximo. Minister di finanza Angel Bermudez a mustra NoticiaCla.com cu e concepto di ley ainda ta den trayecto di legislacion. Raad van Advies a duna nan conseho y departamento legislativo ta trahando esaki. Segun Bermudez, su ministerio ta purbando pa keda cla pa e por pasa den staten ainda pa 1 november pero realisticamente esaki no ta posibel. Y mirando cu parlamento tin dos reunion publico caba pa trata e siman aki, Bermudez no ta mucho optimista cu e por keda cla pa 1 november awor.

Mirando cu e no a cuminsa ainda, segun proyecto cu tabata 1 september, gobierno mester a ahusta e placa aki den e presupuesto supletorio, pa gobierno no cay pega atrobe. Como tal, segun e mandatario a splica NoticiaCla.com, a reserva dos pa tres luna di placa (cada luna ta genera 5 pa 6 miyon) pa por ta ok. E unico luna cu lo por perde ta november, ya cu esaki si no a keda poni den e presupuesto supletorio.

E aumento di 1% di e health tax, mester yuda genera fondo pa sostene AZV, y ta un di e alternativanan cu a bin cune pa sigura e fondo di e seguro medico aki. Inicialmente esaki mester a drenta na vigor 1 di september, y despues a keda pospone esaki cada bes.