Dialuna awor Marc Figaroa ta cuminsa como director di APA NV

ORANJESTAD – Dialuna awor, director nobo di Aruba Ports Authority Marc Figaroa ta cuminsa cu su labor nobo. Asina minister di turismo Dangui Oduber a confirma pa NoticiaCla. Diaranson e mandatario a firma e contracto cu Figaroa pa oficialisa e funcion nobo aki. Figaroa ta bin di aeropuerto (TRIPLE A) unda cu e la fungi pa varios aña den funcion di mercadeo. 

Figaroa tin un Master Degree den Business Administration y a specialisa den aviacion. Despues di a caba Colegio Arubano, el a sigui su estudionan na Daytona Beach, na Merca. E tin 13 aña trahando na Aruba Airport Authority NV y pa 11 aña e ta den e funcion di “Commerce Manager” encarga cu henter e maneho comercial na e Aeropuerto di Aruba.

Bou e maneho di Marc Figaroa, Aruba Airport Authority a gana premionan internacional, debi na e prestacion di e Aeropuerto, satisfaccion di clientenan, ademas sin lubida e parti di aviacion. Bou su maneho e entradanan di Aeropuerto tambe a conoce un crecemento drastico den e ultimo decada. Marc a demostra di tin e experiencia, conocemento y capacidad pa eherce e funcion importante aki. Minister Oduber ta contento cu e escogencia aki y asina ta duna un Arubiano hoben e oportunidad aki.