Bikker: Aruba no mester di TBO pasobra cu RST ta suficiente

ORANJESTAD – Aruba no mester di un Team Bestrijding Ondermijning (TBO)  pasobra cu e protocol di Recherche Samenwerkings Team (RST), (Aruba) ta suficiente (cubri). Asina minister di husticia di Aruba Andin Bikker a bisa NoticiaCla e siman aki. Segun e mandatario, TBO nunca no a opera na Aruba y no mester tampoco, cu tur respet pa nan expertisio. E hecho cu Corsou  St Maarten si tin un TBO y RST, ta pasobra nan tin un otro tipo di areglo. Sinembargo e portal aki a compronde cu debi cu Aruba no tin un TBO, RST a haci un excepcion den su ‘scope di trabou’ pa por a asisti y haci trabou ‘extra’ pa yuda cu e caso di Ibis. Esaki pasobra no lo tabatin personal suficiente di otro forma pa haci e trabou. 

AREGLO DIFERENTEE areglo diferente ta cuminsa cu e hecho cu Corsou y St Maarten tin un otro tipo di Status Aparte cu Aruba, incluyendo diferente ley di reino hudicial. “TBO a bin netamente pa Corsou y St Maarten” Bikker a sigui bisa. “Nos tin un protocol cu RST, y e experticio di RST ta suficiente. Nos no mester di ningun dimension adicional” E mandatario a sigui bisa. 

CASO IBISDen caso IBIS unda cu e sospechoso principal ta ex minister Paul Croes, Aruba a usa asistencia di RST, paso sino Dienst Landsrecherche Aruba no a lo logra su so. Den caso di Paul Croes, expertonan di husticia a splica e portal aki cu a keda comproba cu Dienst Landsrecherche Aruba no ta capaz di hasi e tipo di investigation aki sin RST oftewel Hulanda, cual ta hasi e necesidad di un TBO na Aruba hustifica. Bikker sinembargo ta pensa otro, esta cu RST ta suficiente. E mandatario no a reacciona si riba e ayudo di RST den caso di Ibis. E portal aki a compronde cu den e cuadro di IBIS, RST a haci un excepcion den su tarea, pasobra normalmente e meta di RST no ta pa combati corupcion sino crimen organisa internacional. A bin e pensamento dilanti cu dicon Aruba no ta tuma e posicion di 'El que no debe no teme' y accepta TBO. Pero e mandatario a subraya cu RST ta suficiente.