Paul Croes: Ta manera nada cu mi declara, ministerio publico ta kere

ORANJESTAD – Ta manera nada cu mi declara, ministerio publico ta kere. Na palabra ex minister Paul Croes durante su ultimo palabra na huez diamars atardi. Na final di tratamento di su caso, e por a hiba palabra. Aki ta unda e.o. Croes a splica cu nada cu e bisa, fiscal ta kere. Ademas, den loke a bira su ultimo Croes a admiti e efecto cu e demanda di 5 aña di castigo di prison pe tabatin riba dje.“E cos a dal mi duro” Croes a confesa na huez. “ Mi mester a procesa esaki un rato, pa despues confronta prensa pafo. Eyfo mi a bisa prensa cu si ta ministerio publico, mi lo haya sentencia di cadena perpetua. Y awe mi ta para riba mi palabranan” Croes a sigui bisa, despues di a tende e repliek di fiscal di awe mainta. 

CASTIGO A CUMINSA

Mientras cu sentencia ta cay dia 22 di februari proximo unda cu huez por sea mande KIA bek, of dune absolucion, pa Croes, su 

sentencia a cuminsa caba dia cu nan a haci e inval na su cas na maart 2017. “ Mi a sintimi den un cel virtual” Croes a sigui bisa. Despues el a sigui pa describi su dianan den detencion na KIA y den cel na warda di polis. “Ta algo cu nunca antes mi a experencia. Sinta den un cel di 3 pa 2 (meter), 22 ora pa dia” Croes a sigui bisa. “Y ariba dimi (e piso ariba:red) tabatin e homber deteni cu a mata su mayornan. Bo por imagina ki efecto esaki tabatin riba mi” Croes a sigui splica huez. Croes tabata deteni pa 3 luna den e parti di presonan cu problema psichiatrico esta IBA (Individuele Begeleidingsafdeling) y den cuadro di esey pues, el a haye cu e persona ey den e mesun departamento.  Segun Croes, el a sinti su mes humiya, y ta considera cu el a haya un castigo doble. 

EMOCIONAL

Contrario na e otro biahanan cu Croes a para papia, diamars si na dos occasion e no por a contene su emocionan. E prome tabata ora cu el a describi e momento ora cu e docente di su yiu homber a yame riba un pintura unda cu e yiu a pinta e situacion di e inval na cas unda cu tabatin cachonan di polis presente. Croes a sigui splica cu tambe su bida a cambia, y cu el a perde hopi amigo y conocirnan debi na e caso. Siman pasa, hasta e relacion di añanan largo cu e tabatin cu banco (CMB), a para siman pasa. E hecho cu e club social Kiwanis di cual el a pertenece nan dje pa 12 aña largo, tambe a para su miembrecia. “Esey a afectami hopi” Croes a bisa. Na final, el a ripiti na huez cu p’e, e ultimo 22 luna tabata castigo suficiente p’e. “Mi ta rogabo, pa saca mi for di e miseria aki” Croes a finalisa bisando huez. E huez ta dicta sentencia dia 22 di februari 2019 pa 9’or di mainta.