Paesch na huez: Mi tin confiansa cu bo lo pone un fin na e pesadia aki

ORANJESTAD – Melony Paesch a sinti’e mane e tabata para dilanti klas dilanti un docente, gebullied. Asina el a cuminsa splica huez na comienso di su ultimo palabra den caso Ibis. Na final di e tratamento di e caso diamas, huez a permiti Paesch pa bisa loke e tin cu bisa ainda. Y Paesch no a basila, y a saca tur loke e mester a saca y a tuma su tempo pa esaki. Y na final el a roga huez pa pone un fin na e pesadia aki aki cu el a pasa aden. No ta prome biaha cu el a haya e oportunidad pa papia, y te hasta a pidi huez despensa pa su explosion emocional den corte biaha pasa. Na mas di un occasion el a haya e oportunidad pa bisa algo, pero tabata diamars cu el a saca tur loke e mester a saca, y a tuma tur su tempo pa esaki. 

EMOCION

Manera por a spera, Paesch a bira emocional atrobe, y constantemente su lagrimanan tabata domina e discurso, pero asina mes Paesch a purba contene su mes y entre lagrimas tabata splica su situacion cu el a haya su mes e ultimo 22 lunanan. E hecho cu fiscal a acusa Paesch di ta usa lagrima di cocodrilo (lagrima falso), no a cay na agrado di Paesch. “E caso (aki)  a haci mi hopi dolor. Mi tin sentimento mixto. Mi tin confiansa (si) cu bo ta un huez honesto, imparcial cu por pone un fin na e pesadia aki” Paesch a bisa. Contrario na esey, e no tabatin ni un bon palabra pa e fiscalnan den e caso aki. Sigur no pa e hecho cu segun Paesch, fiscalnan a opta pa atake personalmente. 

EFECTO RIBA YIUNAN

Mientras cu Paesch a bay den hopi detayes, algun punto cu a resalta ta e biaha aki, e efecto cu e caso tabatin riba su dos yiunan. Uno di 5 y otro di 7.  Entre nan, cu ora cu a detene su casa Paul Croes, cu den un solo tiro, Paesch a bira, mama, tata, docter, psicologo y ainda mester a keda bon pa por a maneha e negoshinan di dje. “Mi kier sa pakico muchanan di 3 y 5 aña a haya limitacion. Ki posibel daño y efecto nan por a haci e caso” Paesch a bisa huez, refiriendo na e limitacion unda cu pa un periodo largo, e tata no por a wak su yiunan. Segun Paesch, su yiunan a sufri fisicamente y mentalmente. A describe e situacion di ambos yiu den detayes, pa asina laga tur hende compronde e seriedad di e caso. El a splica cu muchanan tabata bully su yiu homber, y cu nan no por a drumi nan so mas, y cu te cu awor, nan ta drumi tur hunto tur anochi.

PASADO

Paesch a bay asina leu unda cu el a comparti te hasta e parti di su propio pasado, splicando huez ( y tur demas presente den sala di corte) con e no kier pa su yiunan experencia loke el a experencia como yiu. Esta cu el a keda cu un sicatriz mahos. El a splica con ora cu e tabata chikito, e mesun edad di su yiunan actual, cu su tata tambe a cay cera, y cu diripente su heroe, esta su tata, e mester a laga atras cada bez cu bishite na KIA. Esaki tabatin un impacto fuerte riba dje, te na grandi. Y cu e no kier pa su yiunan pasa den esaki mas. Esey tabata un preparacion pa si en caso Croes keda sentencia y tin cu bolbe bay KIA.