Gobierno kier aumenta castigo severo pa bom melding falso

ORANJESTAD – Gobierno kier aumenta castigo severo pa bom melding falso. Asina minister di husticia Andin Bikker a informa diamars mainta durante un conferencia di prensa. Esaki ta relaciona cu e 3 bommelding cu a tuma lugar ultimo simanan na Aruba su aeropuerto. Y mirando cu esaki ta menasa seguridad di Aruba y ta trece e turismo tambe na peliger, gobierno a dicidi cu nan ta actua riba esaki awor. A propone pa haci cambio na cierto leynan riba e tema aki. Aworaki e castigo maximo pa un caso asina ta 4 aña y un multa di placa di posiblemente 50 mil florin. 

PROPOSICION 

Proposicion na ministerraad lo bay pa cierto cambionan pa codigo penal cu ta referi varios articulo, e.o. 283, 284, 372, cu ta regarda melding falso di bom, of ta laga obhetonan etc, cu ta e casonan cu a pasa den ultimo simannan. Segun Bikker, a haci un sondeo huridico cu a trece na claridad cu na 2014 ora cu a introduce e codigo penal nobo,   no a para keto na esaki, actualisa esaki di tal forma cu a simplemente 'copy paste' algun di nan di otro paisnan. Pero ta e situacion di ultimo simanann cu a pone cu a cambia riba esaki. Ta papia di hisa castigo pues  pa e actonan aki y hopi severo. Esaki ta pa ora un hende hinca esaki den su cabez pa actua malo y haci un melding falso di bom. 

EFFECTO

E efecto di un bom melding ta multiple, for di e efecto di seguridad, te na e aspecto economico. Aruba no por perde su ‘edge’ di ta sigur, y tambe no por risca perde nos categoria di nos aeropuerto na uno menos cu categoria # 1. Pa September 2019, lo mester ta cla pa e regulacionan di ICAO (International Civil Aviation Organisation) keda adapta. Den e caso economico, e ta afecta e aeroliñanan cu tin cu keda mas largo Aruba, y e hecho cu avionan mester keda desvia pa otro destinacion. Tur esaki ta trece gastonan cu ne cu mester wordo cobra na un instancia of isla.