Vaders: Ministerio Publico a contradeci su mes den caso Ibis

ORANJESTAD – Ministerio Publico (OM) ta contradeci su mes den caso Ibis, y a haci esaki tanto= durante e rekisitorio como ora di e repliek presenta den Corte. Asina abogado defensor Marije Vaders a purba convence e huez diamars mainta den continuacion di e caso. Ademas varios punto cu segun Vaders a presenta den su defensa, OM no a bin bek riba dje, cu ta confirma cu loke cu defensa a trece ta corecto. Y Vaders a sigui sistematicamente pa repasa varios punto crucial cu e ta kere cu a merece atencion. Huez mientrastanto a cera e tratamento pa loke ta Paul y Melony Croes- Paesch y ta dicta sentencia dia 22 di February 2019. 

DUPLIEK

Den continuacion di reaccion (dupliek), Vaders a splica huez cu e base di e caso ta, cu ora cu a haci e prome inval na cas di su cliente dia 28 di maart 2017, no tabatin pruebanan contra su cliente. Y declaracionan di un conferencia di prensa teni e mesun dia, ta comproba esey, Vaders a sigui bisa. Ta te despues di detencion di sospechonan di tramitador Filiciana y comerciante Schwengle algun tempo despues, cu OM a bin haya informacion riba cual a cuminsa traha un caso contra Croes. No obstante esey, ya durante e conferencia di prensa caba riba mesun dia di e prome inval, tabata cla cu Croes tabata esun cu nan ta tabata su tras. Ademas ya durante e conferencia, a haci mencion te hasta di castigonan di prison. Cu esey, Vaders kier a comproba su teoria di e practica di OM di ‘fishing expedition’, esta busca cualkier forma pa haya cos pa por colga su cliente. 

PRUEBA CONTUNDENTE

Loke tambe Vaders a trece dilanti ta cu, for di e cantidad grandi di grabacion telefonico y supuesto pruebanan adkeri asina, no tin ni un cu ta prueba cu su cliente Paul Croes a ricibi placa of fabor di un di e sospechosonan directamente. “No tin ningun prueba independiente pa esey” Vaders a bisa. Pero lamentablemente, OM no ta haci mencion di esey den nan demandanan, e abogado a sigui bisa. 

NO TA HACI MENCIONUn punto cu sigur a hala atencion, Vaders a sigui bisa, ta porta loke OM no a bisa den tanto su rekisitorio como su repliek. Entre otro emencion riba e dos ambtenaarnan cu a bin dilanti cu informacion cu tabata e base pa inicia e investigacion segun OM mes lo a declara. Tampoco OM ta haci mencion di e casonan cu Croes ‘diripiente’ no ta wordo acusa mas di dje, (di 23 esaki a keda reduci na 3).   OM tampoco a haci mencion of a reacciona riba e splicacion di e proceso di haya ontheffing. Vaders a splica henter e proceso biaha pasa pa tur hende por a compronde kico exactamente ta sosode eynan.  Pero nada di esey a bin bek den e repliek di OM segun Vaders. Tampoco a haci mencion of trece dilanti, material di comparacion di ontheffing di pasado, pa hink’e den contexto corecto. Cu e comparacion ey, por saca afo di enberdad Croes a actua malo cu e dunamentonan di ontheffing, y cu si enberdad e cantidad tabata asina hopi compara cu su predecessor.  Loke si OM a haci bon segun Vaders, ta e forma con nan ta blo pinta Croes malo, ‘djies pa mustra kico a sosode’. Y finalmente, e bida luhoso cu Croes y casa tabata hiba, tampoco no por a wordo comproba segun e abgado. Segun potret cu a wordo saca dia di e inval, por a nota claramente cu cliente tabata drumi ‘riba un matras riba vloer’. Pues nada di luho, segun Vaders. 

LABAMENTO DI PLACAAbogado defensor Demis Illis despues a sigui e tratamento, unda cu a atrobe a a tuma e parti di casa di Croes, esta Melony Paesch pa su encargo. Su prome ponencia tabata pa desbarata e cargo principal contra su cliente, esta esun di labamento di placa. E pregunta crucial segun e abogado, ta cu si OM por a prueba palpable cu enberdad cupractica labamento di placa. Y esaki sigur no tabata e caso segun Illis. Cu esaki segun e abogado, OM a reconoce cu esey no a sosode. Ademas, si tabatin prueba mes, esaki no a wordo substancia suficiente. E discussion di cuanto placa a wordo usa pa laba of pa cumpra cos, entre otro e trafico di placa efectivo (cash), no ta corecto. Falta di informacion pa defensa por a mustra esaki tambe ta tilde OM di dje. Enbez di haya documentonan necesario, a sea no duna esaki bek (material confisca), of duna esaki bek den un format cu no por a us’e. Por ehempel, un caha cu recibo. Enbez di debolbe e recibonan, a ofrece nan un ‘excel sheet’ cu un presentacion di e transaccionan. “No ta esey nos a pidi”, Croes dado momento mes a bisa huez. Tambe e posibilidad pa presenta nan banda di medaya riba e parti ey (di cliente Paesch), no tabatey segun e abogado. “Pues pakico ta comenta cu e (Paesch) no a haci cierto declaracionan?” Illis a puntra huez, si e no a haya e chens. Ademas, segun e abogado, OM no por a presenta ni un prueba contundente cu tabatin un transaccion financiero ilegal y of dubioso. Esey lo mester a lanta sospechoso (Red flags),  pero aki atrobe no tabatin ni un prueba asina. “Awor, sii bo sigui declara esey si, esey no ta haci’e bira berdad si” e abogado a sigui bisa, usando un dicho Hulandes. E impression cu Illis a haya ta cu ‘OM ta ‘cera wowo pa pruebanan presenta’. Riba e cuestionamento di e taxateur Ecury, e abogado tambe a purba trece claridad. Segun Illis, OM ta cuestiona credibilidad di e taxateur cu mester a balora e cas pa motibonan financiero (tin discrepancia pa sumanan cu lo a paga na hypoteek segun OM:red) , cu por cierto ta uno cu ta traha casonan tambe pa Corte di Husticia mes, y a yuda traha pa hopi caso grandi. Y pa colmo, e taxateur cu si OM ta recomenda, esta Bikker, e abogado no conoce pues por compronde cu OM no ta actuando mucho corecto den su mesun fabor segun Illis. . E abogado a sigui pa critica OM pa e hecho cu ta purba hinca palabra den boca di su cliente Paesch ora di interoge riba placa. Basa riba e tactica ey, OM kier pretende cu Paesch lo a bisa cierto cos siendo cu esey no ta e caso. Y finalmente, Illis a referi na e defensa final di un otro suspechoso, e caso Capriles. Mas specifico, a usa parti di e clausura di colega abogado Chris Lejuez. Illis a sinti cu e palabranan ey e kier usanan tambe pa presenta su punto miho.

CULTURA POLITICO NA ARUBA

Segun Illes, e loke cu Lejuez a declara un dia prome, ta splica e situacion y cultura perfectamente. A puntra huez si e ta corda e palabranan ainda, sino e lo ripiti nan, pasobra nan ta su pensamento (esta di Illis) tambe. Ta trata e diferencia di cultura entre Hulanda Y Aruba ora cu ta trata politica. Entre otro mester pensa riba e relacion hopi cerca entre e politico, sea parlamentario y of politico compara cu Hulanda. Segun Illis, porta OM no por imagina (siendo Hulandes), cu un hende por bati riba porta di cas di premier Rutte na Hulanda, of topa Rey Willem Alexander pa regla un passport di emergencia. Na Aruba sinembargo, esey ta diferente y e ehempelnan menciona, ta masha normal. Pues den e contexto ey, no por culpa Croes di su practica politico ora cu hende acerke, y of visa versa. Esey no ta ilegal aunke cu OM kier hink’e den un bachi asina. Finalmente, Illis ta mustra cu OM a presenta un percepcion robez y basa riba esey, a stipula un castigo pa Croes y su casa. Finalmente, a pidi huez pa tene cuenta cu tur esaki ora cu e ta dicta sentencia.