OM: ‘Nos a keda desapunta den e defensa di sospechoso Croes y Paesch’

ORANJESTAD –  "Ministerio Publico ta desapunta den e defensa di sospechosonan (Paul) Croes y (Melony )Paesch" . Asina fiscal Gerritsen di ministerio publico a inicia su reaccion (Repliek) diamars mainta contra e defense di e ex minister y su casa den e caso Ibis. Den un reaccion di 36 pagina total (REPLIEK) cu a dura un ora y mei, e dos fiscalnan cu a trata e caso, a purba sigura huez  cu nan pruebanan ta contundente y cu de hecho, nan no a spera tampoco cu defensa lo por a contra aresta e ola di prueba di soborno cu e ex mandatario a haci su mes culpable na dje. E defensa di Croes ta haya chens pa reacciona riba e ‘reaccion’ di OM despues.

AJEDRES RIBA DOS DIFERENTE TABLA

Segun e fiscal, ta parse cu OM y e defensa ta ‘hugando ajedrez riba dos diferente borchi’, den sentido cu ta manera ta dos caso diferente ta wordo trata. Asina diferente e puntonan treci contra otro ta parse. Segun fiscal, mientras cu OM ta tratando di haya e berdad riba mesa, y e defensa ta (sin bisa pakico e pruebanan presenta no ta valido) solamente purbando di ‘rescata’ e imagen di Croes. “Asina so por splica pakico Croes ta grita solamente ‘mi ta inocente, mi ta inocente’, pero no ta duna contenido na esaki”. Loke fiscal a tuma tanto Croes como Paesch na malo, ta e hecho cu hopi cos durante e investigacion y interogacion nan no a clarifica y a opta pa keda keto. Ta te na final, y no na un forma convincente, a bin purba desbarata cierto informacion. “Bo no por tuma e rechercheurnan fiscal na malo si nan a bin cu cierto declaracion y splicacion pa material haya”, e fiscal a bisa. No cu esaki, segun nan, lo trece cambio den e proceso. E strategia cu Croes y Paesch a usa, segun OM, no ta esun mas beneficioso pa nan, ya cu hopi cos awor ta keda ‘sin splicacion’, cu ta solamente perhudica e defensa. Esaki grandemente segun OM, a sali Croes y Paesch malo, den e parti di splicacion di sumanan cu nan ta acusa di a ‘laba’. Esaki lo keda splica den un siguiente articulo.  

BASE DI PRUEBA

Fiscal a sigui pa contraaresta e puntonan di defensa, punto pa punto. Entre nan e intento pa kibra e credibilidad di e dos sospechosonan crucial den e caso aki, esta Schwengle y Filiciana y e otronan manera e Chines Siem Mong. Mientras cu defensa a purba kibra esaki door di alega cu ta trata di dos sospechoso di cual nan declaracionan no ta confiabel, y cu nan a gaña, OM ta mustra cu ta netamente e pruebanan presenta pa e tres personanan aki ta e base di e prueba contra Croes. De hecho, segun OM, no tin ningun motibo pa duda den e declaracionan haci. Afterall, pakico segun OM, e sospechosonan ey (pa cual a pidi 16 luna y 2 aña respectivamente) lo mester incrimina nan mes cu declaracionan falso, pa despues bay sinta un castigo na KIA.

NO ADMISIBLE

Mientras cu defensa a sigura cu mester declara e ponencia di OM como no admissible, segun OM, no ta cla ki parti tabata malo pa cual mester declara nan inadmissible. Pa esaki a ilustra varios criteria legal. Ademas e hecho cu ta cuestiona e tactica di OM pa crucifica Croes y Paesch, no ta corecto segun defense. OM a reacciona bisando cu ningun momento ta papia di un ‘fishing expedition’, sino mas bien cu pa ora cu a haci e prome inval, tabatin suficiente informacion pa por sospecha Croes di e cargonan menciona. Ademas, durante e conferencianan di prensa, ningun momento a label Croes caba como culpable, pero a simplemente haci mencion di ‘sospechoso’. E critica cu lo no a suministra defensa cu informacion na tempo y despues no suficiente, tambe OM a purba desbarata. A haci tur cos conforme ley, y ‘afterall e informacion manda ta loke huez comisario mes a aproba cu a worod usa como medida pa e caso’.  Tampoco por papia di intimadacion pa loke ta trata e strategia y tampoco e forma di manda relato di prensa.

CARGONAN

Punto pa punto (lesa otro articulo), OM a refuta e parti cu e defensa a cuestiona riba dje. A bau den extenso riba e cargonan di ‘corupcion, soborno, e fundacion, sospechoso Selma Arends, maluso di funcion, labamento di placa, y malversacion di fondo di e fundacion’. A tuma menos tempo pa e parti di ta parti di un organisacion criminal y otro temanan pasobra ‘esey ta hopi cla y nos no tin problema cu esaki’.

TRAHADO ILLEGAL

A dedica basta tempo na e aspecto di cu Croes y Paesch lo a emplea un persona illegal, y a usa declaracionan e.o. di e directora di DIMAS y di DPL pa argumenta nan punto. Mes momento a probecha pa splica pakico e declaracionan inicialmente tabata importante pero mes momento no importante pa nan wordo scucha como testigo. Berdad a inicia e caso cu nan declaracion, pero ta a base di e declaracion di e sospechosonan Schwengle, Filiciana y Siem Mong, cu e investigacion a cana y cu e cargonan contra Croes y Paesch a keda formula.

CASTIGO

Aki tambe OM a para keto, purbando di convence huez cu e argumentonan usa pa hustifica e castigo pa primordialmente Croes, tabata na su lugar y a purba desbarata e argumentonan di e defensa. Keda pendiente pa un relato mas extenso riba varios parti di e tratamento di ministerio publico awe mainta.