Henriquez kier reconstrui e edificio “Rio Grande “

ORANJESTAD – E doñonan nobo y desaroyado di e edificio Rio Grande, cu a keda basha abou diasabra mainta, ta dispuesto pa reconstrui esaki bek ‘den tur su splendor original’. Un 24 ora despues cu NoticiaCla.com a haya e prome reaccion di e desaroyado, conocido comerciante local Raoul Henriquez, nan a emiti un di dos version, unda cu den e version aki, nan ta papia awor di reconstrui e edificio, cu 24 ora prome a wordo benta abou. Segun e parti nobo di e comunicado, Henriquez ta bisa cu “ ta lamenta profundamente cu otro edificio destaca mester a bira victima di e manera di traha y pensa di nos aparato Gubernamental. Na mes momento nos por asegura un y tur cu nos ta keda cu speranza cu awor cu e paso critico aki a ser tuma instancianan lo colabora cu nos pa nos por reconstrui e casita den tur su splendor original.

Tabata 24 ora prome cu Henriquez a emiti e prome version, cu a keda publica anteriormente pa NoticiaCla.com. Aki e desaroyado y doño nobo, Henriquez,  ta lamenta inmensamente cu diasabra, contra di nanmiho intencionnan e cas di cunucu conoci como Rio Grande den curazon di Noord a wordo demoli. E comunicado a confirma kico a sosode diasabra mainta , y a purba splica mas bien e pakico. For di momento di e suseso, tabatin hopi reaccion di tur banda. Pero e doñonan nobo mes no a reacciona sino te diasabra anochi. Den e comunicado no ta menciona e nomber di e desaroyado, pero ta conoci cu ta trata di e conocido comerciante local Raoul Henriquez , cu tin varios establecimento riba nos isla. E ta splica pues den e comunicado kico a pasa cu e cas di cunuco historico a wordo demoli. Y e motibo principal  segun e. Segun e desaroyado, en vista di un posibel intervencion gubernamental y e daño y perjuicio importante cu esaki lo causa, ‘nan a haña nan mes forza di cambia nos plannan original’. Pues de hecho, tardansa y burocracia di gobierno a conduci nan na loke a sosode diasabra mainta.

Segun ‘e desaroyado’, hopi a wordo bisa y skirbi riba e topico aki den week-end. “Mayoria speculacionnan infunda y ningun fuente a tuma contacto cu nos pa informacion” e desaroyado ta sigui bisa.

“ Manera tur hende cu conoce nos bon sa, semper nos tin nos cultura y nos historia na curazon y semper nos a haci nos maximo esfuerzonan pa conserva y duna realse na nos patrimonionan en particular” e desaroyado ta sigui bisa. Segun e desaroyado, desde compra di Rio Grande y den tur preparacion di e plannan di desarollo pa cu e sitio aki, semper tawata nan intencion di curazon di conserva e cas bieu aki mientras e parti nobo lo a wordo construi rond di dje.

Segun e doño y desaroyado, a critica e tempo tambe cu a tuma pa completa e formalidadnan pa por a cumpra Rio Grande. “ Pero tambe nos tin cu lamenta cu despues nos a wordo forza pa warda un tempo inhustifica pa nos plannan wordo aproba. Mientras otro autoridadnan ariba nos isla a indica nan intencion pa interferi den nos plannan y asina demora realisacion di nos plannan ainda mas”.

Segun ‘e desaroyado’, tur hende sa cu Gobierno su so no ta capaz pa conserva nos herencia cultural y nos monumentonan. “Si di verdad nos ta spera di logra esaki nos lo mester por conta cu sector priva manera a keda comproba den varios ocasion. Contrario na algun comentario populista, e peliger pa nos monumentonan no ta e falta di legislacion pa proteha nan, sino al contrario. E peliger ta sinta den departamentonan gubernamental excesivamente rigoroso cu en realidad ta stroba realizacion di conservacion comercialmente alcanzable, “ e ta sigui bisa. (lesa e version nobo di e desaroyado aki)