Blok: Ultimatum pa Maduro sino ta reconoce Guaidó como presidente di Venezuela

DEN HAAG – Hulanda y Inglatera ta uni nan mes na e yamada di Francia, Alemania y Spaña pa cu Venezuela. Si Nicolas Maduro no anuncia eleccionan presidencial dentro di 8 dia, nan lo reconoce lider di oposicion Juan Guaidó como e president. “Reino Hulandes ta hopi precupa pa e crisis politico y humanitario na Venezuela” minister di Relacionan Exterior Stef Blok a bisa den un carta na Parlamento Hulandes.  Guaidó tin sosten di entre otro Merca, Canada, Brazil y otro den region. Maduro sinembargo ta wanta duro na e sosten di Russia y China. 

ULTIMATUM

Venezuela no tin intencion pa duna oido na e ultimatum di e paisnan Europeo. Asina minister di relacionan exterior di Venezuela Jorge Arreaza a bisa den e reunion di Nacionan Uni diasabra riba e tema di Venezuela. “Di unda boso a saca den boso cabez pa pone un deadline of ultimatum na un pais soberano? Esaki ta un muchachada” Arreaza a bisa. Lider di e partido socialista na mando Diosdado Cabello a bisa cu ningun hende por oblliga Venezuela. 

AYUDO MERICANO

E corant Mericano Wall Street Journal a raporta cu un dia prome cu Guaidó a proclama su mes como presidente di e pais, el a ricibi un yamada di vice presidente di Merca Mike Pence, cu a sigure cu e lo sostene un cambio di poder. Esey a pone cosnan cana liher y berdad ora cu un dia despues Guaidó a proclama su mes, Merca mesora a pone e sosten tras di dje. Potret y fuente NOS.